Serchhip Sports Complex-a MFA Inter-District Senior Women Football Championship 2023-24 khelh mekah nimin khan group match khelh zawh niin, naktuk, Inrinni-ah quarterfinal khelh a ni dawn.
Nimina inkhel hmasa berah Khawzawl chuan 3-0-in Kolasib an hneh a, Khawzawl hi Group D-ah winner niin, vawi hnih an khelhah Kolasib hi tlawm ve ve mahse an pahnih chauha Group D-a an awm avangin quarterfinal an thleng ta tho a ni.
Inkhel pahnihna Group C inkhelah Serchhip chuan 1-0-in Siaha an hneh a, goal awmchhun thuntu hi Lalsangpuii Sailo a ni a, Group C-ah point 6 hmuin Serchhip hi Group winner an ni a, Siaha hian point 3 hmuin runner-up an ni.
Inkhel pathumnaah Aizawl chuan 3-1-in Cham-phai an hneh a, Aizawl hian point 6 hmuin Group B winner an ni a, Lunglei hian point 3 hmuin runner-up an ni.
Inkhel hnuhnung berah Group A runner-up inchuh-naah Hnahthial chuan 2-0-in Lawngtlai an hneh a, Hnahthial hian point 3 neiin Group A runner-up an ni ta a, point 6 hmutu Saitual chu group winner an ni.
Naktukah quarterfinal khelh a ni dawn a, inkhel hmasa ber hi chawhma dar 9-ah tanin, Saitual leh Champhaite an inkhel ang a, chawhma dar 11-ah Aizawl leh Hnahthial, chawhnu dar 1-ah Serchhip leh Kolasib leh, chawhnu dar 3-ah Khawzawl leh Siaha-te an inkhel ang.