Zothlifim Logo
Loading ...

Lai Autonomous District Council (LADC)-ah United Legislature Party hruaitu, South Lungpher bialtu MDC, Congress Member C.Lalmuanthanga chu LADC Chief Executive Member atan Lawngtlai District Bawrhsap Cheemal Siva Gopal Reddy chuan nimin khan rinawmna thu tiamtirin a lalut.

Lakluh inkhawm LADC Hall-a neihah hian CEM thar C.Lalmuanthanga chuan a kaihhruai sawrkar a pian theih nana hmalatute chungah lawmthu sawiin, Governor leh Chief Minister hmalakna chu fakawm a tih thu a sawi a, LADC-ah huapzo, mipui sawrkar kalpui a tum thu a sawi bawk a, langtlang taka sawrkar kalpui chu tul a tih thu sawiin, LADC Budget ringawt chu innghahna tham a nih loh vangin hmasawnna huam zau zawk dapchhuak tura tanlak atul tih a sawi a, Lai mipuite, kohhran leh tlawm-ngai pawl te, chanchinbu-mite chu ram hruainaah a tulna apiangah thurawn pe a, khalh ngil a ngaih pawha neitu chan-chang turin a sawm a ni.

CEM thar hian Deputy Leader atan Lungtian bialtu MDC, Sanghuliana a ruat thu a puang a, a thawhpui tur Executive Member dangte pawh a tihfel thuai a rinawm.

CEM thar hian nimin khan a Office luah nghalin, Pathian hnenah inhlanna hun hman a ni a, hemi hnu hian Lai District Congress Committee Office leh MNF District Hqrs Lawngtlai Office a tlawh nghal a ni.