Zothlifim Logo
Loading ...

Nimin khan Central YMA Committee Room-ah NGO Coordination Committee (NGOCC) buatsaihin Sairang atanga Hmawngbuchhuah thleng rel kawng kaltir tum chungchangah inrawnkhawmna neih a ni.
Inrawngkhawmna kaihruaitu NGOCC Chairman, Lalhmachhuana, President, CYMA ni bawk chuan RTI Act hmanga zawhna CMO-in a chhan dan chuan, rel kawng kal lehzel turah sawrkarin mipui ngaihdan a la ang a, mipui ngaihdan anga kal a ni ang tih a nih thu sawiin, “Chuvangin mipui huapzau thei tur anga kan ngaih kan inkokhawm a ni,” a ti.

Lalhmachhuana chuan Sairang atanga Hmawngbuchhuah thleng rel kawng a kal chuan a tha leh \tha lo zawng te, environment leh economy lamah te, inchimralna kawngahte nghawng a neih theih avangin uluk taka ngaihtuahna sen NGOCC chuan tul an tih thu a sawi.

Prof. Malsawmliana, Secretary, NGOCC chuan Rel kawng chungchanga NGOCC-in thu a lo dah tawh dan leh sawihona hun buatsaih a nih chhante a sawi a, Hrangtawna, IRTS (Rtd), Consultant (Railways) chuan Sihhmui atanga Hmawngbuchhuah Rel kawng siam dan tura ruahmanna (project) leh hmalak chhoh dan turte a sawifiah bawk.

Inrawnkhawmnaa tarlan a nih danin, Mizo-ramah chhungah Bairabi atanga Sairang Sihhmui thleng Rel kawng siam mek a nih bakah Sairang to Hmawngbuchhuah thleng rel kawng kal tur hian preliminary survey neih a ni tawh a, Sairang to Hmawng-buchuah rel kawng hi kms. 223-a thui tur niin, he rel kawngah hian lei (bridge) 110 leh leiverh (tunnel) kms. 98.63 a thui awmin, rel station 16 awm tura ruahman a ni a, tunah hian final survey nei turin ruahmanna a fel tawh a, preliminary survey nen a danglam deuh thei dawn a ni.

Sairang leh Hmawngbu-chhuah inkara rel kawng siam tumna awm chungchangah hian NGO hrang hrang leh Political Party-ten ngaihdan sawiin, Mizoram lailia rel kawng kal turin nghawng a neih dan turte sawiho a ni a, sawihona atang hian NGOCC-in ngaihdan a la siam leh dawn a, pawl leh mimal râwn tur âwmte an la râwn leh ang a, chumi hnuah rel kawng chungchanga mipui ngaihdan chu Mizo-ram sawrkarah NGOCC-in a thehlût dawn a ni.

Inkawmhonaah hian NGOCC-a tel pawl hrang hrang – CYMA, MUP, MHIP, MZP, MSU bakah Political Party hrang hrang – BJP, MPCC, PC, ZPM, ZNP aiawhte an tel a, NGO pawl dang – Mizoram Environmental NGO Coordination Committee, Centre for Environment & Social Justice (CESJ) leh Mizoram Merchant Association (MIMA)-te an tel a, mimala tel tura sawm te an tel bawk a, sawrkar department – Police, Revenue, Home leh Aizawl DC office a\anga telten rel kawng chung-changa an department kaihhnawih leh hmalak dante an sawi bawk.