Serchhip khawpui tui tlan tur lakna Tuikuma PHE Department tuikhuaha luang lût luite pakhat chu Thawhtanni (13.5.2024) tlai khan tûr hmanga hrai niin, he lui hraitu nia puh mi pathumte chu Serchhip Police-ten an man tawh.
Thawhtanni tlai dar 5 vel khan he kawrte, Khuangthuama vau lui an tiha chakai meichher chhit tura kalten chakai thi leh vak chhuak engemawzat an hmuh avangin tûra hrai ngei niin an hria a, he thu hi PHE Department thawktu-te hnenah thlen nghalin, PHE Department hotute chuan Serchhip Police Station-ah FIR an thehlût zui a, Police-te chuan he thil thleng an chhui zuinaah mi pathum – Lalmuanpuia (25), Vanlalliana (38) leh Laldinpuia (45), New Serchhip IOC Veng vekte chu thu zawhfiah turin an la a, anni hian an tih ngei a nih thu Police-te hmaah an inpuang a, hetiang thil hi mipui vantlang hriselna nghawng thei a nih avangin IPC section 428/429/277 hnuaiah thubuai siamsak niin, nimin khan Serchhip Court-ah hruai an ni.
Heng mite hian he luia chakai man tumin tûrin an hrai niin hriat a ni.
He thil thlen thu an hriat hnu hian PHE Department lam pawhin tui pump leh sawngbawl hna an thawh lai an chawlhsan nghal a, darkar 7 vel an chawlhsan hnuah tui pump leh sawng-bawl hna thawk chhunzawm leh nghal mahse tui sem lam a nghawng dawn tih PHE Department hotute chuan an sawi a, nimin khan Tuikum atanga tui pump chhuahna pipeline keh a awm bawk avangin ni 2/3 vel chu tuisem dan pangngai a nghawng an rin thu an sawi.