Serchhip Sports Complex-a MFA Inter-District Senior Women Football Championship 2023-24 khelh mekah nimin khan match hmasa ber (Group A)-ah Saitual chuan 3-1-in Lawngtlai an hneh a, Saitual hi group match 2 an khelh tawhah la chak ve ve-in Group-A winner an ni.
Inkhel pahnihna (Group B)-ah Aizawl chuan 4-1-in Lunglei an hneh a, Lunglei hi match 2 an khelh tawhah la chak lo ve ve-in, an tla fel ta a ni.
Group C inkhelah Siaha chuan 1-0-in Mamit an hneh a, Mamit pawh hi match hnih an khelh tawhah la chak lo ve ve-in an tlafel ta bawk a ni.
Vawiinah Group match khelh zawh a ni dawn a, inkhel hmasa ber chawhma dar 9-ah Group D-ah Khawzawl leh Kolasib-in group winner nih an inchuh dawn a, an match hmasa zawkah Khawzawl hi 2-1-in an lo chak tawh a ni.
Inkhel pahnihna, chaw-hma dar 11-ah Serchhip leh Siaha-ten Group C winner nih an inchuh dawn bawk a, a chak zawk zawk group winner an ni ang a, an in-draw chuan Serchhip hi group winner an ni ang.
Chawhnu dar 1-a inkhel pathumna Champhai leh Aizawl-te pawhin Group B winner nih an inchuh dawn a, chawhnu dar 3-a Hnahthial leh Lawngtlai-te inkhel turte chuan Group A runner-up nih an inchuh dawn a, a chak lo zawk zawk an tla dawn a ni.