Serchhip District Cricket Association (SEDCA) chuan nimin khan DC Conference Hall, Serchhipah April ni 23-26, 2024 chhunga Champhaia khelh zawh tak, 3rd Inter District Cricket Tournament-a champion an nihna leh player-te chawimawina hun an buatsaih a, he hun hi Serchhip District Bawrhsap David Lalthantluanga’n khuallian niin a hmanpui.
Serchhip District Sports Committee Chairman ni bawk David Lalthantluanga chuan SEDCA chu pawl naupang tê ni siin hun reilote chhungin hlawhtlinna ropui tak an chhar chu lawmawm a tih thu sawiin, champion team-te a lawmpuina thu a sawi a, player-te chu an pawl hruaitute inpekna hre reng turin a chah a ni.
District Bawrhsap chuan cricket chu India rama sports lâr ber a nih angin player-te tan eizawnna tling a ni a, India team-a tel pha tan phei chuan field chhung leh pawnah hausakpui lawihna tham game a ni tiin, Mizo infiammi cricket-a tuite chu tan la turin a fuih bawk.
Cricket Association of Mizoram (CAM) hnuaia district-te inelna-ah hian final-ah Serchhip chuan a thlengtu Champhai chu wicket 8 a hnehin a vawi khat nan an champion a, final match-a half century siamtu Vanlalhruaia, Serchhip chu ‘Man of the match’ atana thlan a ni a. Player of the tournament lawmman chu Suraj Singh, Serchhip (132 runs & 9 wickets) chuan a dawng a, Hmingthanpuia, Serchhip (9 wickets) chuan Best Bowler lawmman a dawng bawk.
Nimina hun hman hi SEDCA president HD Lal-hmachhuana’n a kaihruai a, Serchhip Cricket Champion team leh coaching staff-te hnenah lawmpuina pawisafai hlan an ni a, hei bakah hian Serchhip District atanga Mizoram Cricket Team-a tel – Hmingthanpuia, New Serchhip Bazar Veng, Lalrindiki, Serchhip Chan-mari leh K.Zohmangaihsanga, Lungphote hnenah chawimawina hlan a ni bawk.