Serchhip District Bawrhsap David Lalthantluanga chuan Serchhip District chhunga khua leh tuite chu Aadhaar enrollment ngai pawimawh tur leh a hun taka Aadhaar update thin turin a chah.
Hriattirna a tihchhuahah chuan Aadhaar chu sawrkar laipui leh state sawrkar-in a dah pawimawhin, sawr-kar thil tihna reng rengah Aadhaar number hman a ngai deuh zel tawh tih tarlangin, hei vang hian Aadhaar enrollment ngai pawimawh tur leh a hun taka Aadhaar update thin turin a chah a ni.
District Bawrhsap-in mipuite ngaih pawimawh tura a tarlanah chuan kum 10 aia upa chuan Aadhaar revalidation tih tur a ni a, Proof of Identity (Pol) (Mahni nihna fiahna) leh Proof of Address (PoA) (Mahni chenna fiahna) upload tur a ni tih a tarlang a, my Aadhaar portal-ah Rs.25/- chawiin documents (Pol leh PoA) te upload-in mahni in-update/revalidate theih a ni, a ti a, Aadhaar Enrollment Centre-ah Rs.50 chawiin a tih theih tih a sawi bawk.
Hei bakah hian Mobile phone number thlak chuan Aadhaar update zel tur a ni tiin, naupang kum 5 an tlin hun leh kum 15 an tlin hunah Mandatory Biometric Update tih tur a ni a, kum 5 – 7 inkar leh kum 15 – 17 inkarte tan man chawi a ngai lo tih sawiin, zirlai zirna sâng zawk/phai lama lehkha zir chhunzawm tumte tan phei chuan hei hi ngaih pawimawh tur a ni, a ti.