Union Home Minister Amit Shah chuan nimin zing dar 9 khan Chief Minister Lalduhoma chu telephone-a bia-in, Assam Rifle sawn chhuahna tur Memorandum of Understanding, hun engemaw chen Home Ministry-in an kawl tawh chu hapta khat chhunga tihfel a tum thu a rawn hrilh.
Tun hnaia Chief Minister Delhi zin lai khan Union Home Minister hi a zin chhuah lai a lo nih ve avangin an inhmu hman lo a, chuvang chuan lehkhain Cyclone Remal leh raltlan chhawmdawlnate leh Assam Rifle sawn chhuah thute hi Home Minister hnenah hian a thehlut a, lehkhate a hmuh hnu hian Chief Minister hi a rawn be nghal a ni.
Cyclone Remal chhawmdawlna leh raltlan tanpuinate chu an rawn pe chhuak dawn tih CM hi a rawn hrilh bawk a, Assam Rifle sawnchhuahna tura Mizoram sawrkar, Assam Rifle leh Central sawrkarte inremna Memorandum of Understanding, hun engemawchen Home Ministry in an kawl tawh chu tun dinhmuna mutan nia a ngaih thu Chief Minister hian a lo sawi a, Union Home Minister Amit Shah hian kar khat chhunga he MoU hi lo chinfel a tum tur thu a hrilh a ni.
Aizawl khawpui atanga Assam Rifles sawn chhuah tur chungchangah hian kum 1988 May ni 31 khan Zokhawsanga Assam Rifles insawnna tur hian agreement tihfel tawh a ni tih 6.1.1993-a Assembly Session-ah Revenue Minister Zalawma chuan a sawi tawh a, hemi hnu hian Zokhawsang chu Assam Rifles-te insawn-na tura cheibawl a ni a, amah-erawhchu peihfel hleih theih a ni lawk lo a, sawrkar hma-saa I&PR Minister Lalruatkima chuan 2019 February khan Assam Rifles-te chu Home Ministry-in Aizawl khawpui chhung atangin May ni 31 hmaa Zokhaw-sanga insawnfek vek tura a rawn hriattir thu a sawi a, hetihlai hian khatihlaia Home Minister Lalchamliana chuan June, 2019-a Assembly Session-a ziaka zawhna a chhannaah Aizawl khawpui laili atanga Assam Rifles-te insawnna tur Zokhawsanga Assam Rifles Complex sak hna chu building thenkhat pawimawh zual leh building panna kawng siam zawh a la nih loh vangin Assam Rifles-te Zokhawsang ah an la insawn theilo tih House hrilhin, an insawn hun tur sawi theih a la nih loh tih a sawi a ni.
April ni 1, 2023 khan Union Home Minister Amit Shah chuan Aizawl Lammual-ah Assam Rifles-te Zokhawsanga an insawnna tur a hawng a, Assam Rifles-te pawh Zokhaw-sangah an insawn tan a, mahse Aizawl khawpuia an hmunpui erawh an la chhuahsan lo a, 2023 September khan AR insawn chhuak tura Mizoram sawr-kar leh Assam Rifles-ten memorandum of understanding (MoU) an duan (draft) chungchangah Ministry of Home Affairs (MHA) atangin chhanna dawn a la ni loh thu hriat a ni.
Sawrkar thara Chief Minister Lalduhoma’n June ni 20, Ningani-a Delhi-a Union Home Minister Amit Shah a kawmnaah ARte hi an insawn ngei dawn thu a lo hrilh a, hmalak tawh chinte enin August thlaah rawn zin a tum thu a sawi niin sawrkar thuchhuah chuan a tarlang a, hemi bawhzui hian tun thla ni 4 khan Chief Minister Lalduhoma hoin Minister, Assam Rifle hotute leh Mizoram sawrkar mi pawimawhten Zokhawsanga Assam Rifle sawn chungchang thil pawimawhte an sawiho a ni.