Serchhip District Bawrhsap Paul L.Khuma, MCS chuan nimin khan Serchhip District MJA member-te DC meeting Hall-ah kawmin, Serchhip District hmasawnna tura thawhhopuiah DC chuan a sawm a ni.
He hunah hian District Bawrhsap chuan District Administration chu dan leh thupek kenkawh mai bakah hmasawnna hnathawh (development) kalpuina kawngah a pawimawh hle tawh tih sawiin, District Bawrhsap a nih hnua sawrkar department hrang hrangten a office-a an hnathawh dan chungchang an sawifiahna-ah hmasawnna hna thenkhatah chuan department mala thawh aiin department dang nen tangho (convergence)-a hna thawh chuan chak zawkin hmasawnna a kal thei dawn tih a lang chiang tih sawiin, department hrang hrangtentha taka hna an thawhho theihna atana thawhpuiah thuthar thehdarhtute chu a sawm a ni.
Sawrkar hnathawkte chuan kalphung pangngai angin an hna tha takin an thawk reng thei tih a sawi a, hetihlai hian dânin a phal chin chhungah thil thar ngaihtuah chhuak tura ngaihtuahna sen a tul tih sawiin, Serchhip District tana hmathlir leh thil thar kalpui tum a neih zingah Digital District leh Green District-te a tel tih sawiin, Secretariat-a a awm laia hlawhtling taka an lo kalpui tawh sawrkar file thlen chin awlsam taka hriat zung zungna tur, Digital file tracking system pawh kalpui tum a ni tih a sawi a, awmze nei zawka sawrkar hnathawkten hna an thawh theih nan Result framework Document (RFD)-te pawh Serchhip District-ah hman theih a ni dawn em tih an zirchian mek thu a sawi bawk.
Hei bakah hian District Bawrhsap chuan khua leh tuiten an harsatna leh an vuivaina te a thlenna tur dik tak hnena awlsam taka an thlen theihna tur leh zawh-fiah duh an neihte an zawh-fiah theihna tur atana sawr-karin a duan, ‘Mipui Aw’ (mipuiaw.mizoram.gov.in) chu hman tangkai thiam a tul thu leh, sawrkarin department thenkhatin anmahni dawrtu mipuite chanvo hunbi tiam chhunga an tihhlawhtlinsakna tura duan, Mizoram Right to Public Services Act-te chiang lehzuala mipuiten an hriat a tul thu a sawi bawk.
MJA Member-te chuan District chhunga mipuiten har-satna an tawh hrang hrang – Cyclone Remal vanga chhiatna thleng te, NH-54 kawng laihin a nghawng chi hrang hrang te, vawk pul hri ASF chungchang te, ruihhlo do chungchangte bakah, District hmasawnna atana hmalakna tur an duhte an sawi chhuak a ni.
NH-54 chungchanga complain lutte a hmun ngeiah official-ten an endik tawh thu leh, an hmuhdan report-te ngaihthlak leh sawiho a ni tawh tih sawiin, District Bawrhsap chuan NHIDCL hnuaia contractor-te chu July ni 24-ah kokhawmin, kawng laih vanga harsatna thleng chi hrang hrangte chinfel dan an ngaihtuahho dawn tih a sawi a ni.
Meeting-ah hian hian MJA Serchhip District member-te hi an president C.Lalhminghlua’n a ho a, District Bawrhsap hi SDO (Sadar) Rebecca Laldinmawiin Hrahsel, Settlement Officer Gaston Vanlalhriat-puia leh DIPRO Lalnun-mawii-ten an tawiawm a ni.