Elina Svitolina chuan Wimbledon fourth round-ah Chinese Wang Xinyu leka hnehna changin quarter-final a thleng a, Svitolina chuan Russia-in an ram, Ukraine a beih avanga mipui tam tak thi a, naupang tam tak damdawi in-a an awm hnua inkhelh chu har a tih thu a sawi.

Thawhtanni khan Russia chuan missile hmanga Ukraine beiin, mi 36 thiin, mi 140 an hliam a, hei vang hian Ukrainian kum 29 mi, Svitolina hian a inkhelh-naah pawh a kawr vârah ribbon dum a bel a, 6-2, 6-1-a Xinyu laka hnehna a chan hnuah Svitolina chuan, “Vawiin hi ka damchhunga inkhelh har ka la tih ber zinga mi a ni,” tiin mittui tla chungin a sawi a, “Inkhelha insawr bing pawh har tak a ni,” tiin a sawi bawk.
Svitolina hian 2022 Wimbledon champion Elena Rybakina chu quarter-final-ah a hmachhawn dawn a, 4th seed Rybakina hian fourth round-ah hian 17th seed Anna Kalinskaya a hmachhawn a, 6-3, 3-0-a hma a hruai laiin Kalinskaya hi a banrêk na vangin a inkhel chhunzawm thei ta lo a, tunah chuan Rybakina hi seeded player sang ber a ni tawh a ni.

11th seed American kum 30 mi, Danielle Collins chu 31st seed Barbora Krejcikova lakah 7-5, 6-3-a tlawmin a tla a, Collins hian January thla khan tun season hi a inkhelh dawn tawh loh thu a lo sawi tawh a, Wimbledon chu a mangtha dawn ta a ni.

French Open-ah pawh lo champion tahw, World number 2 hlui Krejcikova hian Wimbledon quarter-final a khelhna hmasa ber turah hian a hnampui leh French Open champion hlui vek, 13th seed Jelena Ostapenko a hmachhawn leh dawn a, Ostapenko hian top seed Iga Swiatek vaw tlatu, unseeded Yulia Putintseva chu 6-2, 6-3-in a hneh a ni.