All India Football Federation (AIFF) chuan Zirtawoni zan khan New Delhi-ah Award sem chhuakin, award ngaihhlut hlawh ber, AIFF Best Ben’s Player of the Year 2023-24 chu Mizo tlangval Lallianzuala Chhangte hnenah hlan niin, AIFF Promising Men’s Player of the Year-ah Mizo tlangval bawk David Lalhlansanga hnenah hlan a ni bawk.
Lallianzuala Chhangte hian a kum zawnin AIFF Men’s Player of the Year a dawnna niin, he award tum khat aia tam dawng thei player pangana a ni a, 2023-24 season khan Indian Super League-ah Mumbai FC tan competition hrang hrangah goal 11 thunin, assist 7 a nei a, ISL-a Indian player zinga goal thun hnem ber a ni a, India team tan June 2024-a Doha-a World Cup Qualifier khelah Qatar lakah goal a thun bawk a, kum 27-a upa, Lallianzuala hian ISL champion Mumbai City FC tan hian 2026/27 season tawp thleng daih turin contract a ziak thar leh tawh a ni.
AIFF Promising Men’s Player of the Year chawimawina dawngtu Mohammedan Sporting striker David Lalhlansanga hian season liamta khan I-League, Calcutta Football League leh Durand Cup-ah Mohammedan Sporting tan goal 34 zet thunin, title pahnih a chawipui a, CFL leh Durand Cup-ah phei chuan top scorer niin, May 2024 khan a vawi khatna atan India team-a koh a ni.
2023-24 Indian Women’s League champion Odisha FC midfielder kum 30 mi, Indumathi Kathiresan chu AIFF Women’s Player of the Year atan thlan niin, 2023-24 Indian Women’s League-ah goal 5 thunin, IWL-ah hian Best midfiel-der atan thlan a lo ni tawh a, India National team tana a khelhnaah February 2024-a Turkish Women’s Cup an khelhnaah Estonia lakah goal a thun bawk a ni.
Jamshedpur FC coach Khalid Jamil chu AIFF Men’s Coach of the Year atan thlan niin, season laihawlah Jamshedpur hi enkawl tanin, Kalinga Super Cup semi-final a thlenpui a, hei hi he competition-a club thlen san ber tum a ni.
AIFF Promising Women’s Player of the Year-ah IWL-a HOPS FC tana khel winger kum 18 mi, Neha hnenah hlan a ni bawk.
SAFF U19 Women’s Championship-a India title lakpuitu Sukla Dutta chu Women’s Coach of the Year award hlan a ni a, Sreebhumi FC chu IWL 2-ah champion puiin, IWL khel turin a tlinpui bawk a ni.
Referee of the Year-ah Ramachan-dran Venkatesh leh Assistant Referee of the Year-ah Ujjal Halder-te thlan an ni bawk.