Serchhipa ni 3 chhung kalpui tur ‘Sikul Bungraw Inthleng Runpui (Swap & Save)’ chu vawiin (26.3.2025) khan Rebecca Laldinmawii Hrahsel, DUDO, Serchhip chuan a hawng.
UD&PA Hall, New Serchhip Venglaia hawnna hun hmannaah hian DUDO chuan ‘Sikul Bungraw Inthleng Runpui (Swap & Save)’ hi Aizawlah hlawhtling taka kalpui a nih hnuah Department hotuten hmun dangah kalpui ve nise an ti a, tunah chuan inbuatsaihna chawpchilh tak nen kalpui a ni tih sawiin, tih leh hunah inbuatsaihna changtlung zawk nen kalpui theih a beisei thu a sawi a, tuna sikul bungraw inthlen runpui kalpui chu mipuiin hre tam se an duh tih a sawi a, tunah chuan school bungrua chauh kalpui a ni a, nakinah chuan thil dang pawh a la kangkai zel mai thei, a ti a, khawdangah pawh kalpui ve duh mahse Department lam chuan a huaihawt thei rih lo a, VC-te hmalakna pawhin kalpui theih mai a nih a rin thu a sawi bawk.
Hawnna hun kaihruaitu Lallawmzuali, Manager, UD&PA, Serchhip chuan Sikul Bungraw Inthleng Runpui hi Self Help Group leh UD&PA Department-in a buaipui dawn tih a sawi a, hawnna hunah hian Settlement Officer Gaston Vanlalhriatpuia, Area Level Federation (ALF), VC aiawhte leh MJA-te an tel a ni.
Sikul Bungraw Inthleng Runpui hi ni 3 (26th – 28th March, 2025) chhung, zing dar 10 atanga tlai dar 5 thleng zel kalpui tura ruahman niin, Serchhip khawpui chhunga hmun 3 – UD&PA Conference Hall, New Serchhip Venglai; BNRGSK Hall, Serchhip P&E Veng leh Sub Headquarters YMA Conference Hall, Serchhip Bazarahte kalpui a ni dawn a, heng hmun (centre)-ahte hian zirlaite hmanraw hlui mamawh tawh loh chi hrang hrang – Zirlaibu, School Uniform, School bag leh a dangte thawhkhawmin, heng thil thawhkhawmte hi a mamawhtuten a thlâwnin an la thei dawn a, hmanraw thawhkhawmtute leh an hmanraw thawhte fel taka chhinchhiah zel a ni dawn a, ni 3 hnuah centre pahniha bungraw la bângte chu lakhawmin, UD&PA Hall-ah dahkhawm a ni ang a, ni 3 hnuah pawh he centre-ah hian kalpui chhunzawm zel a la ni dawn a ni.