Nizan hmasa khan UEFA Europa League final khelh a ni a, Italian club Atlanta chuan tun season-a eng club mahin an hneh theih loh German club che tha tak Bayer Leverkusen laka 3-0-a hnehna changin an champion a, Leverkusen-in hneh loh nei loa season hman tluan an suangtuahna chu Atlanta forward Ademola Lookman chuan hattrick hmangin a tihtawpsak a, kum 61 chhung zet trophy chawi loa an awm hnuah Atlanta chuan trophy an chawi ve leh ta a ni.
He final hi Atlanta-in European final an thlen tum khatna a ni a, hetihlai hian Leverkusen chuan tum 3 an thlenna a ni thung a, Xabi Alonso enkawl Leverkusen hian tun season-ah tlawm nei loin game 51 an kaltluang tawh a, duhthusama season khâr turin match 2 chiah khelh tur an nei tawh tihin match pakhat zawkah an tlawm ta hlauh mai.
He inkhelah hian minute 12-na lekah Atlanta hian Lookman hmangin goal an thun nghal a, minute 26-ah Lookman bawk hian goal a thun zui a, Leverkusen-in si hnih an phur ta a, mahse hei hi Leverkusen tan thil manganthlak a la ni lo, tun season-a match 4 zetah si hnih an phurh hnua rawn tho chhuak lehin hnehna an chang leh thin a ni. Mahse tun tuma an hmachhawnte hi chu coach tha tak Gian Piero Gasperini kaihhruai Atlanta an hmachhawn tlat mai a, minute 75-naah Lookman bawkin Atlanta goal thumna a thun zui leh ta zawk a, 3-0-in Leverkusen hi an tlawm ta a, Atlanta chuan kum 1963-a Coppa Italia an chawi hnua trophy an chawi lehna hmasa ber an chawi ve ta a ni.
Gasperini hian kum 2016-a Atlanta a enkawl hnu hian a hma lama Serie A-a lo then kual ve mai mai thin club kha a siam danglam hle a, Gasperini hnuaiah hian Atlanta hian Coppa Italia final tum 3 thlengin, an la tlawm vek thung a, kar kalta khan Juventus nen final khelin an chak lo zo chiah a ni.
Leverkusen hian match khat khelh tur an la nei a, chu chu German Cup final niin, second-tier club Kaiserslautern nen Inrinni khian Berlin-ah an khel dawn a ni.