Mizoram sawrkar Tourism Department bultumin kumin December ni 13 atanga 15 chhung hian Tuirial Airfield-ah Winter Festival neih a ni leh dawn a. Tourism Secretary Pi Esther Lalruatkimi hovin nimin khan a pisaah he ni thum awh Festival hman dan tur rel hian Organising Committee member-te an \hukhawm.
Kumin Winter Festival hi Krismas lamhawia hman tum a ni a. State pawn atanga khualzin mi a tam thei ang ber hip khawm an nih theih nan a tihlar (publicize) lam kawngah pawh kum dang aia uar zawka hmalak tum a ni.
Winter Festival-ah hian zai leh lam ngaithlak leh thlir tur a awm dawn a, mipui a duh apiang tel theihna tur Mizo hnam infiamna hrang hrang ‘Mizo Indigenous Games’ neih a ni dawn bawk a. Thal inkahsiak, photo booth, food stall, powered hang glider, rifle inkahsiak, hot air balloon leh adventure activities hrang hrang a awm ang a. Carnival a awm dawn bakah handloom & handicraft exhibition te pawh neih tum a ni.
Organising Committee hian Winter Festival hman dan tur chipchiara rel tur hian Tourism Director kaihhruaina hnuaiah Programme Committee a din nghal a. He committee hian item hrang hrang neih dan tur leh neitu tur te, ruahmanna tul ang apiang an lo duang leh dawn a ni.