Zirtawpni khan Er. Vanlalruata Sailo, Secretary Mizoram State Project Monitoring Committee (MSPMC) hoin Sumsuih – Turial Link road (RCC Pavement) siam mek leh NH-54, Aizawl – Tuipang kawngpui siam mek, Serchhip leh Keitum chhehvel leivung paihin a nghawng dan an endik.
Ministry of Tribal Affairs, Govt. of India atanga sum hmuh cheng Nuai 426.801 hmanga km 12 a thui siam mek Sumsuih – Turial Link road (RCC Pavement) chu a hmunah kalin an en a, ruahman ang taka a puitlin a, tangkai taka hman a nih theih nan an thil hmuh dante thuneitute hnenah an thlen dawn a ni.
Hemi hnu hian NH 54 Aizawl – Tuipang kawng, NHIDCL hnuaia siam mek leivung paihin Serchhip leh Keitum chhehvel ram a nghawng dan an endik nghal a, kawngpui laihna vûng paihna (Spoil Bank) an siam mekte a tha tawk em tihte uluk taka enin, a bul hnaia huan leh ram a tihchhiat siamthat hna thawh dante an en bakah hmabak hnathawh chhunzawm dan turte an sawipui bawk. He hunah hian kawng laih hna thawktu Kram Infracon Pvt. (Ltd) hotute bakah New Serchhip North leh New Serchhip South VCP te, Keitum VCP-te an tel bawk a ni.
MSPMC Secretary hi MSPMC member thenkhatin an tawiawm a ni.