Zothlifim Logo
Loading ...

Serchhip District chhunga Chhingchhip khuaah tun hnaiah vawk a thi nual a, heng vawk thite sample endikna atangin African Swine Fever (ASF) vanga thi an ni tih finfiah a nih hnuah nimin (15.5.2024) khan Chhingchhip khua chu ASF hri lenna hmun Infected Area-ah puan a ni.

Nimin khan Dr. Biaklianzuali, Sr. Veterinary Officer Serchhip chuan hemi chungchangah hian hriattirna tichhuakin, he hri a darh zel loh nan The Prevention & Control of Infectious and Contagious Disease in Animal Act 2009, Section 20 Sub-section 1-in thuneihna a pek angin, hri len mekna hmun Chhing-chhip khua chu Infected Area-ah a puang ta a ni.

Infected Area, Chhingchhip khua atanga vawk, vawksa leh vawksa atanga thil siam reng reng lakchhuah emaw, lakluh khap a nih thu a tarlang a, vawk thi reng reng paih mai lo a, chinai/disinfectant nen thûk taka phûm ngei tur a nih thu te, vawk talh leh vawksa zawrh khap a nih thu te, vawk thi an awmin, AH & Vety Department official-te hnena hriattir vat tur a nih thute a tarlang.

Heti hian tun dinhmunah Chhingchhip leh Khumtung khuate chu ASF hri lenna, Infected Area-ah puan a ni.