Furpui kan thleng chho mek a, he hun hi thlai phunna hun atana hun tha a nih angin Mizoram sawrkar pawhin Green Mizoram Day hmanna hun atan a thlang a, kum danga lo tih tawh thin angin Green Mizoram Day denchhenin hmanni lawkah Mizoram hmun hrang hrangah thingphun beihpui thlak a ni leh tawh a, tunah hian Serchhipah pawh Serchhip Beautification Committee-in ruahmanna a siam angin NH-02 kawngpui dungah thing phun beihpui thlak mek a ni bawk a ni.
Thing hian pawimawhna tam tak a nei tih chu kan hre vek tawhin a rinawm a, mihring leh nungcha dangte nunna boruak leh ei tur pe chhuaktu a nih thu te, tui hna humhalhna atan thing phun uar kan mamawh hle tihte chu mithiamten uar takin an sawi mek bawk a ni.
Hetianga a pawimawhna piah lamah hian khawpui chhunga mumal taka thing phun te, kawngpui sira thing phunte hian khawpui a timawi a, khaw chhung sik leh sa a vawng bawk a, tuna Serchhipa thing phun beihpui thlak a ni pawh hi thil lawmawm tak a ni.
Hetihlai hian hun kal tawha tawn hriat kan lo neih tawh a\angin khawpui chhung leh kawngpui dunga thing phunna hmun leh kan thing phun tur kan thlan danah erawh kan fimkhur a ngai hle a, kum reilote hnuah mipui leh lirthei chêtvêlna atana hnawksak thei a ni em? tih te, kan thing phun kha a puitlin hunah mipui himna tiderthawng thei a ni dawn em? tih te, engemaw siam/dinna tur hmun tih hriatchian saahte phun loh a tha, kan thing phunte an puitlin hnu-ah kih lehte an ngai fo thin a, a uihawm thin a ni. Tin, thing kan phunah hian mihringte tana ei tur chhuah thei leh thing tlo chi deuh phun uar ni thei se, kan thing phunte hi mipuiten kan hlâwkpui lehzual theiin a rinawm