U KAPA LEHKHATHAWN DAWN KHA ! ! – Lungduhsanga

Love Letter Kum tam fe a liam ta, kha tih lai hun kha . A hun ,ni leh kum ka sawi mai thei tawh lo. Sunday chhuna ‘naupangte hun’ programme radio a kan herhchhuah thin lai kha a ni .Rawlthar kan la ni chiah lo a , naupang chimawm rual,nau zawk te kilkawi a, arngeng tlan leh tuitlan awh tum a thangthleng kan kam hun lai kha a ni a. Hna hram thawk tur a kan la no deuh avangin chhungten a hmingin sikul min kai tir a,ramtang rual kan la ni chiah lo.Kha tih lai kha chuan kan nun kha zalenna khawvel a ni a, aia upa te kan zah a, kan naute pawhin min zah bawk a, u te thlazar a ramchhuah te a nuamin naute kil kawi pawh a nuam thin.Tlai sikul ban a chawtlang nen a thang en nawm thin zia te kha aw.

Ka la hre reng mai,tum khat mi pawimawh tak mai pakhat a boral a vangin sikul kan kai lo a, kawtchhuahah thianho kan awmkhawm a,perhpawng leh sephung laih kan tum niin ka hre ta. Chutia thian hoin kan thil tihtum kan tih hmaa samtawk hmin tawllawt leh tukloh tarh atan a that ber thu te,perhpawng laih lai a a kaw ko a awm chuan perhpawng meihawl a a chan duh thute,sairil tui kap a hnawih tangkaina te kan sawi lai hian paihte sumdawng pakhat hi a rawn kal hnak hnak mai a, kan thian te zing a a chimawm deuh in “eichawp thil kekawlte i zuar em?” tiin an lo fiam a, a thenin “pawihte ka Inah lo thleng rawh, buh leh sa ka hlui ang che,ei puar lik liak ang che” an lo ti bawk a.Chutiang a kan auh lai chuan chu paihte sumdawng pa chuan kan lam lo panin lekha thawn a tlang tial airmail envelope a tuam hi a rawn kengin, “ Naute u Kapliana in hria em, hei in khua ka chhun pelh dawn avangin he lehkhathawn hi lo pe mai ta che u” min ti a. Kan khua hi chu a lian lem lo a, In za khua chauh a nih avangin in hriatlohna tham a nih loh a vangin “ aw le” tiin lehkha thawn chu kei a lianber ka nih avangin ka kutah a a dah ta a.

Nia, u Kapa te chu kan hriat zawng tak a ni hrim hrim a, tlangval hnahkhat nupui neih hun rual a ni tawh a, kan veng tlangval nula mi deuh deuh an sawi khawm chuan a hming hi sawi hmasak pawl a ni tih keini naupang thleng pawhin kan hai ngai lo. Chutia a lehkhathawn kan kut a awm takah chuan keini naupang chimawmho chuan hawn a, chhiar ruk sak kan chak ta tlat a nih chu. Amaherawh chu envelope chu hawng i la, kan char leh thiam a ngem tih chu kan rilru ti hah tu ber a ni ta! Mahse dim deuh a kan hawn chuan a thler lo thei , a thler pawhin ka pa in airmail envelope dang a thirthingrem tepenah pahnih a dah a, ka pa awm loh laiin kan hman sak theih mai kan ring a, mahse envelope a u Kapa Address leh a hming hi aziaktu hawrawp ang tak hian kan ziak thiam a ngem tih chu kan buaina ber a ni ta. Kan chhiarchak em a vangin chu tiang harsatna awm thei te chu ngaihtuah thui lutuk duhloin dim tein a charna ah chuan kan han hawng chhin a, kan han hawng chu buhmal a char a nih avangin rinai takin kan hawng awlsam a, lehkhathawn chu dimtakin kan han hawng a, powder rim a lo nam ram ram a, hmeichhe thawn a ni tih leh kan thenawm khua atang a rawn thleng a ni tih chiang takin kan hre ta a ni.

A neitu / a chhiartu tur kan nih loh vang nge ni kutkhur der der in kan han keng a, ti hian a lo in ziak a

To

King of my heart
U Kapa

A hmasa in kutsuih loh chibai ka buk a che. Vengtu chung Pathian zarah i dam zel ka beisei.Kei pawh Khuanu zarah he ka hringnun derdep tak hian nang ngai em em chung in khawvel hmang mah i la, pialral kawngka a la kik bik em lo e.

Hmanni khan lehkha pakhat i tan ka ziak a,ka pa Chhinga te Aizawl a chiseh lamtur ka rawn kentir a,mahse vanduaithlak takin Bialpui lui kha a lo lian nasa lutuk a, zan hnih a hmunah tuikiam hun an nghak a, ruahpui vanawn a sur reng a vangin an beidawng a, a hnar lamah hel turin an rawn let leh a,chuvangin ka lehkha i lo hmuvat thei lo a, pawi ka ti khawp mai

Tuantul vang a in vangkhua min pan san leh tak chinah khan nangmah ngaiin ka hun leh ni te, ka hmang thin a,i rawn zin chhung hunte kha mitkhap kar lek niin ka hre thin.Chawlni chhun a kan leikapui a serfang kan bawllai ringawt mai mai te kha lung ti leng tu vek an chang zo ta! I pu te lo i feh tum a , fanghma a min chhawlthuai te kha ka thiante leh ka nauten an hre vek a, min chhaih huai huai mai, ‘ ei ve rawh u’ ka tih pawhin “ ka mit a ui hlit ang” an ti a, kan nui nasa thei lutuk.

Kumin chu ruahtui a tam lutuk a, nimin pawh ,ruah a sur nasa si a ka pa ten “engmah in thawk thei lo ang, feh lo mai ru” min ti a, , hmanni a kan lenna thiannu marovite In-ah khan kan awm a,faisa leh puakzo kan kang a,thianu te ho chu an tawihte ho an awm vek a, awi u Kap, ka riang lutuk.Tunlai chu kan veng tlangval ho hnam sipaiah tan an intihhmuh a, Arakan an ti emaw ni, chu lamah chuan an kal sup sup mai,Thiannu mafaki te,sangi te pawh kha an thinpate khan hnam sipai-ah an tansan a, an riang ve lutuk.Anni pheichu ral karkhawsa tur a chhuak anni lehngal a, ka khawngaih ve lehchhawng lutuk.

Thing kan phurhna, bellei mualah te khan kan thian hoin thing kan va phur leh a,i thingtang ro fawmkhawl sa te kha a ngai ngaiin a la awm a, hulhu buk hnuai a chhawl kan phah te kha a lo ro zo tawh a, midang hriat ve tul lo thil he chhawl ro hian min hriat nawn tir leh a,ka ngai lutuk che hi ka mittui a tla zawih zawih mai,U kap, min khawngaih em? min nei dawn ti raw, mahse ka u mami hi pasal nei phawt se,charsut phawi zawng, a zahthlak duh awm em mai,tunah hian palai inleng a nei, favang ruahtui hul ah innei turin ka pa te nen an in be fel in ka hria, an inneih hunah rawn kal ve ngei ngei rawh aw…

Tunlai chu Pu Lalkheran kan kohhranah rawngbawlna a nei a, Chhandam nihin hriatna thalai tamtakin kan nei a, kan hlim lutuk. I tan hla ka nei a sin . Kristian hlabu a mi “ Tlantu ka nei e, vanah khian” tih hla kha an sak apiangin min hrechhuak thin dawn nia, a thunawn kha uluk takin i lo sa thin dawn nia , “ ka tawngtai sak che,ka tawngtai sak fo che” tih kha, Tin , Pathian lehkhabu kha lo chhiar la, Johana lehkhabu pathumna chang 13 kha i lo chhiar dawn nia. Awle, tuntum atan chuan kham lo takin duhtawk phawt mai teh ang.

Zing ni chhuak hi ka chibaina che nise la,
Tlai nitla tur hi ka mangtha na che nimawlh rawh se

I tan a rinawm
Amawii
Mualveng
Khawbial

NB: I single thlalak khawngaih takin min lo thawn rawh.

Chu lehkha chu kan chhiar zawhin kan nui dar dar a, a bawmah uluk takin kan dah lutin buhmal ban bawkin kan char leh thlap a, tlaiah u Kapa te kawmchhak zawl hi kan bak hawlna mual ber a nih a vangin bak hawl tur leh lehkha pe tur chuan mautlawn nen kan chhuak a,u Kapa nau, naupang kan pe a, a chhiar ve ta a niang. Chawlni zan inkhawmah “ Tlantu ka nei e, vanah khian” tih hla chu thuhriltuin ban hlaah a thlang mauh mai a, a thunawn kan sak lai chuan chik takin u Kapa chu kan thlir a, kan ngaihbel nge ni chumi zan tluk a u Kapa hla sa urhsun hmel kha kan la hmu ngai reng reng lo.

Inkhawm ban a lo nih chuan kan inah thianho kan tap khawmuang a,lehkhathawn kan hawn ruk a u Kapa homework Pathian thuchang chhiartur Johana lehkhathawn pathumna chang 13 chu a zawnawlna nen tangkawp a reife kan zawn hnuah kan han keu hmu a, he thu hi hetiang hian a loin ziak a.

“ I hnenah thu tam tak ziak tur ka nei a,nimahsela lehkhatui leh lehkhaziaknain I hnena ziak ka duh lo va;rei lo te a chinah hmuh che ka beisei zawk a, tichuan in hmatawnin kan inbia ang.”

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram

One thought to “U KAPA LEHKHATHAWN DAWN KHA ! ! – Lungduhsanga”

  1. Thianpa Sangtea chu lehkhathawn kan uarlaite min hriatchhuah tir a,lung itilengin min tihlim hle mai,Zothlifim hlutna iti zual e

Comments are closed.