— Laldinpuia —
Secretary, Serchhip District Consumer Assn.
Consumer te thlavang hauhtu Serchhip District Commission in tuhnaia a thubuai rem naa consumer ten hnehna an chan chungchang hi a chanchin bul lam atangin i han tarlang teh ang.
Kum 2017 daih tawhah khan Thingsai khuaa chhungkaw 20 te chuan N, Vanlaiphai Gas Agency-a Gas Double na tura pawisa agency a an pek tawh chu an Gas double anih theih loh avangin, Gas Double na tur pawisa an pek atanga kum hnih hnu, kum 2019(30.7.2019) ah an lungawi lohna Supply Directorate ah an thlen a. Supply Directorate lam hian DCSO chu chhui tura an tih angin kha tih hunlai a Serchhip DCSO Pu Rosangmawia khan sawrkar thuchhuak angin thil thlenna hmun Thingsai leh N,Vanlaiphai-ah te kalin thil awmdan uluk takin a chhui a.
Thingsai khua a mite hian Gas double na tur hi chhungkaw pakhatin Rs 2350/- zel kum 2017-ah N.Vanlaiphai Gas Agency a thehluh turin Thingsaia N.Vanlaiphai Gas Agency lam aiawh(sub-agent) Pi J.Lalawmpuii hnenah hian an thehlut a, Pi J.Lalawmpuii hian pawisa hi lo dawnsakin a dawng ngei tih ziahna lehkha pawh siam a ni a. Pi J.Lalawmpuii hian pawisa hi N.Vanlaiphai a sumo driver hnenah a thawn ngei a, sumo driver pawhin a kengin N.Vanlaiphaia counter-ah a dah ngei tih a sawi a, mahse pawisa hi an hmuh loh thu N.Vanlaiphai Gas Agency te hian an sawi avangin Thingsaia chhungkaw 20 te Gas double na hi an tihsak thei ta lo a ni. Hemi chungchangah hian kum 2 hnuah complaint siam a ni a, police pawhin thil awmdan theihtawpin an chhui ni a sawi a ni.
A hunlaia DCSO Pu Rosangmawia chuan thil awmdan ngun taka a chhui hnuin N.Vanlaiphai Gas Agency te chu an thiamlo niin a hria a, hei vang chuan DCSO chuan ni 14.10.2019 khan N.Vanlaiphai Gas Agency Proprietor chu lehkha thawnin(Letter No.1.21011/1(D)/2016-DTE(SPY)GEN Dt 1.10.2019) Thingsai khaw chhungkaw 20 te chu an Gas Double na chu a rang lama tihsak turin a hriattir a. A lehkha copy hi Supply Director thawn tel a ni bawk. Pu Rosangmawia DCSO hian Supply Director chu a thil chhui dan kimchang tak report a hranpain a thawn bawk a. Hemi hnuah hian Thingsai chhungkaw 20 te Gas double na hi a la fel thei chuang lova, DCSO in tihfel sak tura Agency lam an ngen hnuah pawh Agency lam hian engmah hmalakna an nei lova.
Thingsai a Gas Double tum chhungkaw 20 te hi an mangang tawh hle a, sum tam tak an lo seng tawh bawk nen. Directorate lamah te zualko lehin Directorate lam chuan Serchhip DCSO hnenah report thehlut turin a hriattir leh a. Hetih hunlaia DCSO Pu C. Zadailova chuan theihtawpin a han chhui leh a, thil awmdan te ngun taka a enfiah hnuin he thubuai hi tihngaihna vak a hriatloh thu leh he case thubuai tawp theilo hi Consumer Forum-a thlen mai a that thu Directorate ah ni 12.2.2021 ah ziakin a thlen a (No.S.11012/11/2016/DCSO(SRCP)/29). Tihian Thingsai chhungkaw 20 te Gas double na tur pawisa bo thlau kum 2017 daih tawh ami chu hotu sang te hnen a thlen tawh hnuah pawh chinfel theihlohin kum 2021 thlengin a awm ta a ni.
Kum 2021 April thla khan DCSO staff ten min rawn phone a, he thubuai chungchang hi sawiin an pu in Consumer lamin an ngaihtuah theih a rin thu a rawn sawi a. Theih ang angin hma lakpui nghalin Thingsai lam amite pawh chu biakpawh nghal a ni a. Consumer Court a mumal loh lai anih avangin Lok Adalat ah chuan an thubuai chu thehluh a ni a, mahse Lok Adakat sitting hmasa berah N.Vanlaiphai Gas Agency lam hi an lokal loh avangin thubuai hi ngaihtuah theih a ni ta lova. Hetianga rei tak a inchiah leh vang vang lai hian Consumer Court lam a lo mumal leh ta deuh a. Ni 28.10.2021 khan District Commission ah thubuai hi Thingsai chhungkaw 20 te chuan an thehlut ta a. He an thubuai hi Covid hrileng avangin Court hearing hi Video Conference kaltlanga neih thin a ni a. Vawi hnih hearing neih a nih hnuah Court chuan ni 13.12.2021 khan thuremna an tichhuak ta a(Memo No. CC No 9/2021-DCRC(Schp). An thuremnaah chuan N. Vanlaiphai Gas Agency te chu Gas double na tur pawisa bo chungchangah hetiang hian duhthlan tur siamsak an ni –
- N.Vanlaiphai Indane Gram Vitak te hian Thingsai chhungkaw 20 ten Gas double na tana pawisa an pek Rs 2350/- theuh hi court thu tlukna puan atanga ni 30 chhungin an rul vek tur a ni. Huntiam chhunga an rul lo a nih chuan 12% per annum in an rul ang.
- N.Vanlaiphai Indane Gram Vitak te hian Thingsai chhungkaw 20 te Gas Double na hi document ngai te an neihfel atanga ni 5 chhungin an tihfel sak tur a ni.
Khita tarlan point 2 ah khian a duh zawk zawk thlang turin N.Vanlaiphai Gas Agency te hi hriattir an ni a, Agency lam hian point no 2 khi thlangin Thingsai chhungkaw 20 te Gas double na hi customer ten pawisa chawi belh tawh lovin an tihfel sak a. Ni 7.2.2022(Thawhtan) khan Thingsaia Customer te hnenah Gas double na hi pek an ni ta a ni.
District Commission in Consumer te thubuai a chinfel sak a Consumer ten anchanvo an chang leh hi a lawmawm hle a ni. He thubuai hi kum 2017 daih tawh a mi a ni a, a tuartu te hian sawrkar department lamah te thlenin sum tam tak an lo seng tawh a, mahse an thubuai chinfel sak an ni chuang lo. Sawrkar hotuten thiam an chantir chung pawhin an sum bo an hmuhlet phah chuanglo a ni. Hetih lai hian Serchhip District Consumer Association ten hma an lakpuina avangin an thubuai hi cheng khatmah seng lovin chinfel sak a ni ta zawk a ni.
Consumer te chanvo hriat hi a hlawk a, sum tam tak kan senna tur pawh sawrkar in consumer te chanvo humhalhna dan a siam avangin sum seng lovin kan chanvo dik tak kan chan theih phah thin a ni.