Mizoram sawrkar chuan Lunglei Municipal Council din turin inbuatsaihna a kalpui mek a, LMC Office tur chu September 2022 thla chawhma lamah peih hman tum a ni a, office staff turte pawh Deptt hrang hrang aṭangin pawh khawm tum niin, sawrkar chuan LMC inthlan hi kumin 2022 chhung a neih hman a nih ngei theih nan hma a la mek a ni.
Tun dinhmunah chuan Aizawl tih loh Mizoram khawpui hrang hrangah tualchhung inrelbawlna atan Village Council hman a la ni vek a, tuna kan dinhmunah hi chuan khawpui VC-te aiin thingtlang VC-ten thuneihna hman theih an nei tam zawk a, thingtlangah chuan VC-te hi an khaw inrelbawlna leh inkaihhruainaa thuneitu tak tak an la ni reng a ni.
Hetihlai hian District Hqrs chinah khawtlang inawpna leh inrelbawlna kawngah VC-te kan la hmang hian harsatna tam tak min thlen chang a awm ta mek a, khawpui VC-te hian thingtlanga VC-ten thuneihna an hman theih ang tam tak hi an hmang thei tawh lo nasa hle a, thingtlanga VC-tean an thuneihna an hmanna ṭhin ang tam tak hi khawpuiah chuan sawrkar Department lamin an chang ṭeuh tawh a, khawtlang inrelbawlna leh inkaihhruaina te, khawtlang hmasawn leh hmasawn lohna kawng tam tak hi sawrkar department-a Officer ṭhenkhat kutah a innghat nasa zawk hle tawh a, sawi kual duh tan phei chuan khawpui zawkte hi kawng ṭhenkhatah chuan mi pakhat rorelnaa kûn chângte pawh kan nei tiin a sawi theih hial âwm e.
Chuvangin, District Hqrs. chinte hi chuan kan khawtlang hruaitu tura kan thlan chhuahten thuneihna tam zawk an neih theih dan tur hi kan ngaihtuah a, chumi nei thei tura hma kan lak ve hi a ṭul tawh niin a lang.