Rev Dr. Chauṭhuam’an Tunlai Thil Awmzia a sawi zingah ‘Thluaka Sum lut’ tih chuan sawi zui a hlawh khawp mai a, chutih lai chuan rilru khawihtu ṭhenkhat te han thai lang ve zeuh zeuh ila.
Prime Minister Hlui Lal Bahadur Shastri
Lal Bahadur Shastri India Prime Minister kha taksa pumrua lian lo tak a ni a. Prime Minister a nih lai khan Russian ramah a zin laiin Tashken ramah a thi thut mai a, mi hausa chhungkua an ni lova. An khawsak pawh a nuamsa hmel lo khawp mai. Chhungkua chhangchhe tak an ni a, Prime Minister a nih lai khan an chhungkua hman ve turin FIAT CAR lei nan Bank Loan ₹5,000/- an la a, loan an rulh rulh zawh hma in a thihsan leh thut si a. Loan a lakna Bank khan an rulh bak chu ngaihdam nise an ti a. Mahse, a nupui khan Bank loan ngaihdam chu a duh lova, pension a lakin a rul leh ta a ni an ti.
Keini ni ta se chutiang chuan kan ti ve ang em? tih min ngaihtuah tir a ni. Chu chang ala ni lo. Fa a nei dih diah a, a fapa pakhat phei chu Secondary School-ah Admission ti turin a kal a, midang in admit tur zinga ding vein a tahtawlin an kal zel a, a hun a lo thleng chuan ava in ziak a, pa hming ziah a ngai ta si a, s/o Lal Bahadur Shastri tih alo ni si, admit tu tan phut zawk na tur a ni ngei ang. Duh sela chuan Prime Minister Pisa atangin, “Hei kan Prime Minister fapa a ni a, lo admit mai teh u,” tih awm tak a ni, a ni si lo, Prime Minister fapa chu zirlai dang zingah zirlai a nih angin in admit turin a in tlar ve mai.
Tripura Chief Minister Nipen Chakravarty
Tripura (Reng ram) Chief Minister zinga mi Pu Nipen Chakravarty chanchin an sawi lan fo ṭhin kha a ni a. M.A Double an ti a, Chief Minister a nih lai khan a thawmhnaw inbel man tlawmzia an sawi fo mai. Vai mipa kawrfual man tlawmte mai, ding lam leh vei lama ipte (zenṭeh) nei, Vai lunggi kekawr ha in Bata Chappal a bun a, a kawr hma ipte ah Note bu tereuh te a dah a, ball pen khatih lai a cheng hnih man chuah a thiat a. Ambassador Car ah a chuang a. Minister ve meuh chu police escort motor leh official motor pakhatin a zui mai a. A sana bun lah chu HMT Rs 150/- man chauh a la ni zui.
Nupui fanau a nei hek lo, Minister Bangla (Bungalow) a duh lian lo, official ten an zui ve duah ngai lo. MAHSE a enkawl Tripura state chu a hre chiang em em tho mai. Communist Party sorkar a ni a, mipuiin an chanvo tur an chang tur leh development a ngaihtuah a, state kilkhawr tak chuan a chief minister nih chhung khan hmuh theihin a ṭhang zawt zawt mai. Mi hausa te aiin mipui vantlang ten ngaihsak an hlawhzia an sawi uar khawp mai.
A Khaikhawmna Chu Hnathawh Kawr
Hnam dang, Ringlo, kan tih te nun aṭang hian enge zir tur kan neih? MLA Candidate ten an dinna bulah election campaign an neih laiin, “Hnathawh kawr min hak tir teh u, min thlan tlin chuan in rawngbawltu ka ni dawn alawm,” an ti. Thlan tlin an han ni a, reilote ah an dul a kiar a, an thau a, an bial mipui an cher a, anni an thau nuam ṭhuai a. Car kawngkhar hawn sak leh khar sak ngaiin an awm a, an hnathawh kawr chu a fai rei thei hle a ni lawm ni? An za chuan an ni lo. Hmangaihtu an thauva, an hmangaihte kha an cher ve thung an tih fiamthu te hi a dikna bial awm thei a ni.