April ni 25-ah Mizo Inchai Title Fight nei dawn

Mizoram Wrestling Assocition-te chuan April 25-a Mizo Inchai Tiltle fight AR Lammuala an neih tur chungchangah Aizawl Press club-ah thuthar lakhawmtute an kawm a, he hun ah hian Mizo Inchai Title fight-a champion lai leh amah chotu te phochhuahna an nei.

Palian Champion lai Lalnunfela Salem Veng (22) hian a title humhim tumin Lalsangliana (22), Upper Republic chu a hmachhawn dawn a, Lalnunfela hi Kg 104-a rit, 6 ft.-a sang niin, amah chotu Lalsangliana hi Kg 100-a rit 5’11 ft-a sang a ni. Amaherawhchu, April ni 25 hian Palian Inchai hi kan hmu thei dawn lova, champion lai Lalnunfela hi a hriselna a ṭhat tawk loh avangin a khel thei hrih dawn lova,  Lalnunfela dam ṭhat hun-ah Palian Inchai bik chu hun hranah nei a ni dawn a ni.

April ni 25 hian Palai hawl Champion lai Zodinsanga (25), Venghlui (Kg 74 & 5’9 ft) pawhin amah chotu R.Lalrinawma, E.Lungdar (Kg 75 &  5’8ft.) a hmachhawn dawn a, Pate Champion lai, Lalawmpuia (20), Thenzawl (Kg 58 & 5’3 ft.) chuan amah chotu Lalrammuana, Thenzawl (Kg.59 & ft.5’5) chu a hmachhawn bawk ang,

Nulian Champion lai, Lallawmzuali (23), Chaltlang (Kg.61 &  5’3 ft.) chuan amah chotu, Lalnunmawii (17) Champhai (kg 60 & 5’3 ft.) a hmachhawn ang a, Nute Champion lai, Anita Lalsiamkimi (21), Serchhip (Kg 53 & 5’0 ft.) chuan amah chotu, Lalnilawmawmi (20) Champhai (Kgs. 52 & 5’0 ft) chu a hmachhawn bawk ang.