Boston Marathon-ah chhiatna rapthlak thleng

Thawhṭanni-a Boston Marathon America-a neihah thil rapthlak tak a thleng a, finish line bulah intlansiakte an thlen dawnin bomb a puak a. Bomb hi vawi hnih puakin, mi 3 an thi a, mi 144 chuang an inhliam a ni.

Boston-a thil thleng hi chawhnu dar 2:50 vel a ni a, bomb pahnihna hi a hmasa puah aṭanga second 12 naah a puak leh a. Thi zingah hian naupang kum 8 mi pawh a tel a, inhliam mi 141 zinga 14 te chu an dinhmun a ṭha lo hle a ni.

TV-ah pawh chiang takin alang a, Marathon-a tlan te leh a entute an thal phung a, thisen a luang zeih zuih a. He thil rapthlak tak hi tu tih nge tih hriat a la ni lova, President Barak Obama chuan he thil thleng hi ngaihven zui nghalin, TV-ah thu a sawi nghal a, Obama chuan,”Tu tih nge tih kan zawng chhuak ang. Kan zawn hmuh chuan hremna na thei ang ber a chungah kan lek ang”, tiin a sawi a. He thil hi terrorist thil tih a nih rin a ni a, hei vang hian sawrkar hmun pawimawh dang pawh venhimna pek nghal an ni a. FBI chuan chak takin misual zawn hna hi an thawk nghal a ni.

State Police Roupen Bastajian chuan,”Bomb a puah rual khan a puahna lam ka va pan nghal a, mipui chu leiah an lo tlu nuai a, bomb chuan an ke chu a vawrh darh a, mi 25 aṭanga 30 vel chu an ke bomb hian a ti bung a ni.

President Pranab Mukherjee-a leh Prime Minister Dr Manmohan Singh-a te pawhin Boston-a pawi khawihna thleng hi an dem thu leh thi chhungte an tawrhpui thu an sawi a, Dr Singh-a hian US President Barack Obama hnenah lehkha thawnin US-in a firfiaka chetna a dona chu India-in a thlawp tlat thu te, thi chhungte leh hliam tuarte, India mipuiten an tawrhpui tak zet thute a sawi a ni.