Mizoram News

Chawhrualin MGNREGS hnuaiah ni 89 inhlawhna siam

Sawrkar kum kalta 2012-2013 chhungin Ni 100 Inhlawhna Mahatma Gandhi National Rural Employment Guarantee Scheme (MGNREGS) hnuaiah chawhrualin Mizoram mipuite ni 89 inhlawh ang an ni a, District zingah Kolasib chuan MGNREGS hi hmang ṭangkai berin ni 100 an inhlawh tling a, Lawngtlai ah chuan ni 73 chauh an inhlawh thung.

Rural Development hotute sawi danin sawrkar kum kalta chhung khan chhungkaw 1,73,839 te inhlawhtir an niin tha 1,55,59,100 thawk ang an ni a. MGNREGS hnathawhna atan hian sawrkar laipui chuan cheng nuai 25229.24 pechhuakin state-in cheng nuai 3405.049 in a dolet ve thung a. Ni 100 inhlawhna atana sum awm zawng zawng nuai 29354.39 atangin nuai 29185.8 chu hman zawh a ni. Rural Development department chuan kumthar 2013-2014 a mipuite ni 100 inhlawhna atan hian cheng nuai 32077.41 an ruahman a, heng zinga cheng nuai 30564.21 hi sawrkar laipui pek tur a ni a, cheng nuai 1513.083 chu state tum tur a niin nikum lama hman bang cheng nuai 141.891 chu kumthar a hman tur hian dah nghal a ni bawk. Kumin chhung hian chhungkaw 178367 te chu inhlawh tir tum an ni a, hemi atan hian tha 1635700 sen tum a ni bawk.

Rural Development department hotu te sawi danin NREGS hi khawpui ai chuan thingtlang lamin an hmang ṭhain an ṭangkai pui zawk a, khawpui lamah hi chuan a scheme kalpui tum dan ‘miretheite khaichhuah’ hi a nihna ang takin an kalpui tawklo a ni, an ti.
#    Kum 2012-2013 chhunga Mizoram district hrang hrangte inhlawh dan
Kolasib – Ni 100
Aizawl – Ni 99
Champhai – Ni 96
Mamit – Ni 90
Serchhip – Ni 89
Saiha – Ni 88
Lunglei – Ni 86
Lawngtlai – Ni 73
* Figure hi RD Deptt.  aṭanga lak a ni
#    Ni za inhlawhna (NREGS) hi kum 2007-2008 ah kalpui ṭan a ni.
#    NREGS sum hi Central leh state sawrkar chuan 90:10 in an intumsem thin.
#    Kum 2007 atanga March, 2013 thleng khan NREGS atan hian nuai 143345.79 hmuh a ni tawh a, nuai 139618.5 hmanral a ni tawh.
#    NREGS a ni khat thawhna man `136/- ni thin chu 2013-14 atangin `148/- ah tihpun a ni.