NIOS lem a tam:MSU

April 30-ah School Education Directorate khâr dawn
Mizo Students’ Union (MSU) chuan Mizoramah National Insitute of Open Schooling (NIOS) lem a tam thu leh NIOS hnuaiah zirlai  engemawzat chu sumdawnna atana hman mek an ni an ti.

NIOS chungchangah hian MSU Gen.Hqrs. President, Zodinpuia chuan Inrinni khan Aizawlah thuthar lakhawmtute kâwm-in, NIOS Co-ordinator pakhatin a zirlaite harsatna a siam chungchangah Aizawl SP-ah FIR an thehluh tawh thu a sawi a. Mizo zirlaite chu fimkhur tura chahin, Study Centre piah lama mahni thu-a Open School lo kalpui ve ringawt ṭhahnem tak an awm mek thu te, hei hi dân phal loh a nih thu sawiin, “Heng Open School phuah-chawpte hian NIOS dan piah lamah uchuak takin Admission Fee an la a ni,” an ti.

NIOS hian Monthly Fee lak a phal loh laiin heng Open School phuahchawpte hian thlatin zirlaite hnenah monthly fee `300/- te, `400/- te an lak bakah zirlai pakhatah Admission Fee `1,500 te, `1,700/- te an la tih an sawi a. Phalna nei lo leh danin a phal chin piah lama school hawngtute chungah hremna lekkawh a nih theih nan hma an la mek tih sawiin, “Heng zirna school phuahchawp siamtute hian an titawp lo a nih chuan nasa zawkin MSU chuan hma a la zel dawn a ni, an ti bawk.

Aizawl District-ah Accreditted Institution (AI)/Study Centre 7 chauh a awm tih sawiin, dan lova NIOS lo kalpui ve ringawt te chu titawp tura an phut thu leh hma lak zui zel an tum thu MSU chuan an sawi a. Aizawlah ringawt Open phuahchawp hi 20 dawn a awm nia sawiin, tuna Study Centre 2 te school behchhan chu mumala awm tawh lo, khawilai hmun emaw hmanga ti mai mai an awm thu an sawi a. Heng phuahchawp Open School te hi tihtawp pawh nise zirlaite chu Board lamah register an nih tho chuan an buai phah dawn lo niin MSU hruaitute chuan zawhna an chhang a ni.

MSU chuan deficit leh Private School ṭhenkhat, Admission fee leh Tuition fee sang uchuak taka tunhnia la te chungchang enfiah tura School Education Department a ngenna chu tihlawhtling thuai turin School Education Department a ngen nawn leh a, MSU hruaitute chuan an ngenna tih hlawhtlin nan School Education Department chuan Schoolte chu an fee lak zat an mahni bialtu DEO Office a thehlut tura tih an nia, thehlut lo an la awm avangin he mi chungchangah hian April thla tawp thleng nghah an tum tih sawiin he mi hnuah chuan chak zawkin sawrkar nawr an tum niin an sawi a, MSU-in school fee sang chungchanga kawng hrang hranga hma a lakna chu a hlawhtlinna hmuh tur a awm tak loh avangin, rah ṭha zawk a chhuah theih nan April ni 30, 2013 khian School Education Directorate khar an tum tih an sawi bawk.

MPSC hna lak chung-changa MSU-in sawrkar a nawrna hi April thla chhunga a hlawhtlin loh chuan May thla remchang hmasa berah total bandh huaihawt an tum bakah Aizawl-a Hostel ṭhenkhata inenkawl dan hleihluak lutuk leh zirlai tam takah harsatna thlen thei thil awm nia hriain a rang lama enfiah an tum bawk a, heng thilte hi Executive Meeting-ah an thlirho hmasa leh phawt dawn nia hriat a ni.

India ram pumah NIOS Regional Centre 11 awm mekin Accreditted Institution (AI)/Study Centre 3370 a awm leh a. Mizoram chu Guwahati Regional Centre hnuaiah awmin Study Centre 15 a awm mek a, Aizawl district-ah 7, Lunglei-ah 4, Lawngtlai, Serchhip, Champhai, Saiha leh Kolasib district-ah te 1 zel  a awm a ni.