Zothlifim Logo
Loading ...
Mizoram NewsMizoram News

Mizoram sawrkar Local Administration Department-in Champhai district-a
Vaiphai ram chhunga Saikhumphai Bawk nikum October ni 31-a sawn chhuah
tura thupek a siam chu Gauhati High Court Aizawl Bench-a Judge,
Justice Ujan Bhuyan chuan a ṭhiat.

Hetianga Court thutlukna thar a awm tak avang hian boruak ṭhalo awm
thei palh veng turin Champhai District thuneitute chuan Saikhumphai
bawk lamah hian Police ṭhahnem tham tak an tir nghal a. High Court
Bench-in thutlukna a siam hma hian Police silai keng platoon khat
dahsa an ni a, court thutlukna puan a nih hnu hian platoon 2 dang dah
belh leh a ni a. Inrinni thleng chuan engmah buaina leh boruak
duhawmlo thleng a awm lo a ni.

Saikhumphai hi Vaphai Village Council ram huam chhunga din a ni a,
sawrkar chuan he khua hi phalna nei lo leh dan kalha din a ni tiin kum
2012 October ni 31 hmaa chhuahsan turin a khaw mite chu thupek a pe a.
India khua leh tuite chu Vaphai khuaa insawn tura hriattir an ni a.
Myanmar khua leh tuite chu an rama kir tura tih an ni. Saikhumphai
khaw mite hian LAD thupek hi High Court-ah an khing a, nikum November
ni 22 khan High Court chuan sawrkar thupek hi kenkawh rihloh turin
thupek a siam (stay) a. Tunah hian thupek puitling a siam ta a ni.

High Court Aizawl Bench-in Zirtawpni-a thutlukna a siamah chuan
sawrkarin Saikhumphai Bawk a awmte sawn chhuahna tur thupek a chhuah
chu dan kalh a ni a ti a. Chuvangin he thupek hi ṭhiah a ni a. Mihring
chênna In tih chhiat tawhte pawh Champhai district Bawrhsapin endikin
siam ṭhat leh vekna’n sum leh an mamawh dangte thla 2 chhunga pe turin
court chuan thupek a siam a. Saikhumphai khaw mite court-a an kalna
senso atan `20,000/- pe turin Champhai Bawrhsap chu thu a pe bawk.

Thudawn danin Saikhumphai Bawk khuaa in engemawzat chu sawrkar thupeka
ṭhiah a ni tawh a, Vaphai mipui thinrimin engemawzat an ṭhiah sak tawh
bawk a ni.