Mizoram Pradesh Congress Committee President Pu Lal Thanhawla, Chief Minister chuan, kumin kumtawp Assembly inthlanpui neih turah an party an mal din dawn tih a sawi.
Nimina Congress Bhavan Political Session-ah he thu hi sawiin, ZNP pawhin Party malin an ding dawn tih an puang tawh a, Congress Party pawhin Party malin MLA inthlan chu a hmachawn ang” a ti.
Congress Party Policy chu tharum thawhna leh thisen chhuahna do a, Mipuite remna leh muanna thlifim hnuaia chak taka hmasawnna kalpui a ni a ti a, mirethei leh mihausa inkar zau lutuk siam tha a, miretheiten khaweng an hmuh ve theihnana NLUP an kalpui pawh a la dawnglo-a insawi te an pe ve vek dawn tih a sawi a ni.
Tunah hian NLUP hmangin chhungkaw 120000 tuam hlawm chhoh mek an ni a, heng bakah hian chhung-kaw 15000 thun belh lehna tur centralin a phalsak bawk avangin NLUP ka la dawnglo ti zawng zawng pawh pek an ni ang a ti.
Chief Minister chuan, hmasawnna kawng dik zawhnan Power-a intodelh mai bakah hralh chhuah tham nei turin hma an la mek tih a sawi a, Mizoram lui khuah theih zawng zawng khuap tura hma la in, kawlphetha MW 2500 pekchhuah tum a ni a ti a, Tuirial Hydel Project kawlphetha MW 60 pe chhuak thei, khuah hna chu zaa 40 zo tawhin nakumah zawh hman an tum a ni a, Kawlphetha MW 460 pechhuak thei tur Kolodyne khuah turin NTPC ten hna an thawk mek ṭan tawh a ni a ti a, tunah hian MW 210 pechhuak thei tur Tuivai khuah hna thawk tura tender chhangtu Contractor pasarih aṭangin a an thlang fel thei tep tawh niin a sawi.