MFA Cup Champion Chanmari FC chak zel

Chanmari FC in Mizoram Premier League Round 11-ah champion thei dinhmun a ding Dinthar FC 3-1 in an hneh a. Chanmari FC forward MS Dawngliana chuan hattrick siamin man of the match a thlan a ni.

Inkhel tan tirh atangin team pahnih te an fimkhur a, inkhel beisei angin a nung lova. Minute 13-naah Dinthar FC Defender chetsual avangin Dawng-tea hian a goal hmasa ber a thun a, hei bak First Half-ah goal a lut lo.

Second half-ah goal 3 ngawt a lut a, red card a awm a, penalty a awm bawk a, saved ṭha tak tak a awm bawk avangin inkhel duhthusam tihlo chi rual a ni lo. Chanmari bawkin goal an thun hmasa leh a, C.Lalnuntluanga freekick hlawhchhuah chu pet nghalin keeper T. Mawia’n a man nghet zawh loh avanga a dan per chu Dawngtea’n a goal hnihna atan a lo thun a, Chanmari lawm pawh a la reh lo tihin Dinthar FC in an chhang let nghal a, Mawite-a freekick tha zet chu Ronald Zothanzama’n chiang zetin a lo tauh lut a, Chanmari keeper leh defender te an che hman lo.

Dinthar FC an phur a, mahse goal an thun thei chuang lova, Mahse a tawpah chuan Chanmari forward Dawngtea bawk a langsar a, halfway line pelh hret aṭangin chak taka ball la lutin Dinthar defender C.Rosanga leh Reuben te a tlan pelh hnuah keeper T. Mawia’n a tih tluk avangin penalty a hlawhchhuah bakah T. Mawia chu hnawhchhuah a ni bawk. Dinthar Captain Ramnuna chuan T. Mawia ai rawh ding mahse Dawngtea penalty pet a dang theih tak loh avangin Chanmari FC chu 3-1 in an chak a, Dawngtea chu hattrick siam thei pahnihna a ni ta bawk a ni.