Mizoram News

Myanmar aṭangin Vawk lâkluh khap a ni dawn

Aizawl khawpui leh hmun dang ṭhenkhata vawk pul hri ‘classical swine fever’ leng chuan ziaawm lam a pan tawh hle laiin Myanmar aṭanga vawk lakluh khap a ni dawn.

AH and Vety Director Dr. LB Sailo chuan vawk pul hri hlauhawm zawk Porcine Reproductive and Respiratory Syndrome (PRRS) an tih mai chu tunlai hian Myanmar-ah a leng nasa-a he natna hri hi Mizorama a lo luh ve a hlauhawm em avangin khapna thupek siam turin district bawrhsap-te hnenah hriattirna pek a ni tawh a, tun kar chho hi chuan bawrhsap-te’n Myanmar aṭanga vawk lakluh khapna an chhuah tawh tura ngaih a ni a ti.

Tuna Aizawl leh hmun dang ṭhenkhata vawk pul hri leng ai hian he natna hi a hlauhawm zawk hle tih AH & Vety Director chuan a sawi a, tunlaia hri leng chu a ziaawm tawh hle a, kai thar pawh an awm tawhlo nia an hriat thu a sawi a. He vawk pul hri leng avanga vawk damlo za zela 80 chuang chu an tidam niin a sawi bawk a ni.

Hetihlai hian Mara Autonomous District Council (MADC) thuneitute chuan Vawksa eilo tura mipui hriattirna an chhuah a, hei hi Saiha leh a chhehvela vawk pul hri a len mek vang a ni. Thudawn danin MADC-a Local Administration changtu Executive Member (EM) Pu K. Hrahmo chuan The Mara Autonomous District Council (Public Health & Sanitation ) Rules 2012 Clause (a) of Sub-Rule (1) of Rule 15 tlawhchhanin hriattirna a chhuah a. Thu leh awm hma chu vawksa leh vawksa rep eilo turin mipui an hriattir a ni.

Saiha leh a chheh vela vawk pul hri leng hi Vety department pawhin an ngaihven a, vawk damlo 400 dawn an enkawl tawh nia thudawn a ni a. Hri avanga vawk thi an awm nual nia hriat a ni bawk.