Deprecated: Function jetpack_form_register_pattern is deprecated since version jetpack-13.4! Use Automattic\Jetpack\Forms\ContactForm\Util::register_pattern instead. in /home/lahj9ae7in9c/public_html/wp-includes/functions.php on line 6078 Minister hlui leh MLA ni lai Pu B.Lalthlengliana boral – Zothlifim
East Tuipui bialtu MLA Pu B.Lalthlengliana chu nimin chawhma dar 10:45
khan Aizawl Civil Hospital-ah Kal (Kidney) nâ avangin a thi a, kum
66-a upa a ni.
Pu B.Lalthlengliana hi nizan khan a chenna in Aizawl Bethlehem Veng-ah
tlaivarpui a ni a, vawiin chhun dar 12:00 ah vui a ni ang.
Pu B.Lalthlengliana hi Pathianni chawhma dar 11vel khan Civil
Hospital-ah dahluh a ni a, Pathianni zan dar 7:00 vel aṭang khan a
dinhmun ṭhalo zualin, ICU ah dah a ni a, nimin chawhma dar 10:45 khan
a thi ta a ni. Hun engemawchen chu natna hrang hrangin a tlakbuak
avangin a insawisel fo ṭhin a, tun Assembly Budget Session neih
hnuhnun ber erawh chu ṭha takin ala tel thei a, Doctor te sawidan in a
Kal a ṭha vak tawhlo a, hei bakah hian Malaria PF hrik hmuh ni bawkin,
natna dang pawh a nei neuh neuh bawk.
Pu Lalthlengliana hi kum 1947 April ni 20-ah Mizoram khaw chhak
Farkawn khuaah a piang a, a nupui Chawngpari nen fa 6 an nei a ni.
Zirna lamah MA (Hist) leh MA (Pol.sc) niin, hun engemawchen College-ah
zirtirtu hna a thawh hnuah kum 1986 October ni 15-ah MNF party a zawm
a, MNF Gen Hqrs ah nihna hrang hrang a chelh zui a, kum 1993 MLA
inthlanpuiah MNF party ticketin Sateek bialah thlantlin a ni a, kum
1998-ah pawh a bial ngai aṭanga tling lehin MNF Ministry-ah Minister
of State atan lakluh a ni. Higher & Technical Education leh Sport
Department te a enkawl a, Kum 2003 MLA inthlan puiah a bial ngai
aṭanga thlantlin leh niin Minister a ni leh a. Land Revenue &
Settlement leh Fisheries Department te a enkawl a, Kum 2008 inthlanah
East Tuipui bialah MNF ticket a thlantlin leh a ni.
Nimina a in lama a ruang thlenpui a nih hnuah MNF President Pu
Zoramthanga, MNF Vice President Dr.R.Lalthlangliana leh Finance
Minister Pu H.Liansailova ten sûnna thu an sawi a, Minister leh
Parliamentary Secretary ṭhahnem tak an kal a ni.
Vawiina a vuinaah Chief Minsiter Pu Lalthanhawla leh Assembly Speaker
Pu R.Romawia te bakah Political Party hrang hrang ten thu an sawi ang.
Pu B Lalthlengliana sunna leh an ui thu hi party hrang hrang, MNF,
MPCC, ZNP leh MPC ten an ti chhuak a, Zirlai pawl 2- MZP leh MSU
pawhin, an ui thu thu-chhuah siamin an sawi a ni.
Mizoram News