NIOS leh Zirlaiten inremna siam

Nimin khan MZP Pisa Pui-ah zirlai harsatna tawkte ngenna angin MZP hruaitute kaihhruaina hnuaiah National Institute of Open Schooling (NIOS) Principal leh NIOS zirlai exam theilote chuan inkawmhona neiin, inremna an siam.

NIOS Examination (April 2013)-a exam thei tura in ngai zirlaiten senso ngai zat leh tih tur tul angte an tih fel vek tawh hnua exam an hmachhawn theih loh avanga harsatna an tawh chungchang chu ngun taka sawiho a nih hnu ah inremna hi an siam ta a ni.

An inremna ang chuan Zirlai naupang exam form fill up si, exam thei lo zawng zawngte chu anmahni in an sum leh pai senso zawng zawng an la let leh duh a nih chuan NIOS hian an senso hi a pe let leh ang. Zirlai naupang exam theilo te hian an senso laklet leh an duhna hi ziakin MZP Pisa Puiah an mahni ngei kalin April ni 9, 2013 ral hma ngeiin an thehlut ang a, MZP in a tul angin a lo bawhzui sak ang.

NIOS hian zirlai naupang exam theilo te an senso laklet leh duha MZP a in report te hi May ni 15, 2013 ral hma ngeiin an senso chu a pe chhuak ngei tur a ni. Tuna NIOS Principal laka Vaivakawn Police Station -a FIR thehluh mek hi hetianga inremna siam a nih tak avangin zirlai naupangten ziakin thuneitute hnenah FIR chu sut a nih theih nan an hriattir ve ang. Zirlai naupang exam theilote hian an duh chuan an pawisa pek sa ringin NIOS hnuaiah hian an exam leh thei ang tihte a ni a. MZP Pisa Pui a NIOS (Aizawl West College) zirlai harsatna tawk inhriattir te hi hriat theih chinah mi 25 an ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram