UPC North East India unit Inkhawmpui lian vawi 45-na, Aizawl Vaivakawn Joint YMA Field-a kar kalta Ningani zan aṭanga ṭan chu Nizan khan a ṭiak.
He inkhawmpuia Speaker Brother Brian Norman, USA chuan inkhawm apiangin Pa-thian thuchah a sawi a, thlarau thianghlim an dawn theih nan uar takin thu a sawiin a zirtir thin. Inkhawmpui rorelnaah hian thutlukna engemawzah siam a ni a. UPC NEI Unit kaihruai mektu General Superintendent Rev P. Chunga chu a pension a hun tak avangin Executive Committee chuan a aiawh tur Rev VL Dika Sailo a ruat.
Rorelnaah hian UPC kohhran kalphung tihdang-lamna tur, NE India hnuaia District 11-te’n mahni pual chanchinbu an neih ṭheuh chu chanchinbu pakhat chauh nei tawh tura thutlukna an siam bakah kohhran thawktute hlawh siamtu Pay Commission pawh District hrang hrangin nei lovin Pay Commission pakhat inṭawm vek turin thutlukna an siam a. District huap inkhawmpui palai atan Pastor bial Secretary leh Treasurer te telh thar tur leh Tualchhung kohhran Sunday School Superintendent chu Director tia thlak turin an kohhran dan an siamṭha bawk a ni.
Inkhawmpui-ah hian India hmarchhak huam chhung District hrang hrang aṭangin palai engemawzat an tel a ni.