Mizoram News

Tuikuk ṭhalaiten Bandh huaihawt

Bungṭhuam leilet hnathawk suamtu te zinga mi Tripura Police kut aṭanga tlanchhuak chu an khua, Laitauhpara-ah thinga inkhaihluma hmuh a ni a, a thlavang hauhin Bru Socio & Cultural Organisation leh Young Bru Association te chuan kawng zawhin nimin leh vawiin hian Damchera-ah total Bandh an huaihawt a, helai paltlang ṭhin Mizote chu fimkhur tura ngen an ni.

April ni 8, 2013 khan Bungṭhuam khua a J.Malsawma Leileta hnathawk Abdul Manaf Uddin te chhungkua chu hmaituam mi 7 tualchher silai keng ten an suam a, misualte hian mawilo takin Abdul Manaf Uddin fanu naupang leh a nupui te hi an khawih bawk niin sawi a ni. Misual hmaituam te hian Abdul Manaf Uddin te pawisa kawl cheng 1400 bakah an ar vulh lai 6 leh an mobile phone te an lak sak bawk.

Thubuai hi Kanhmun Police station-ah case ziahluh a ni a, Mizoram Police CID (Crime) leh Tripura Police ṭangkawp te chuan ngawrh takin an chhui zui a, rinhlelh thu-ah Sibaram Reang, Tripura Laitauhpara khua chu an man ta a, Sibaram Reang hian J.Malsawma Leilet hna thawk Abdul Manaf Uddin te chhungkaw suamtu te zingah a tel tih chiang takin a sawi a, a ṭhian dangte awmna leh ralthuam an thuhrukna thlengin a sawi niin thudawn na chuan a sawi.

A ṭhian dangte bihrukna leh ralthuam an thuhrukna hmun ni a a sawi hi Tripura state huamchhung a nih avangin Tripura Police te chuan Sibaram Reang hi an silai thuhrukna leh a thurualpui te awmna hriatchhuah beiseiin an hruai ta a, April ni 14 khan Police te kut aṭang hian a tlanbo ta a ni.

He case hi ngawrh taka Mizoram Police leh Tripura Police lam ten an chhuizui mek laiin April ni 21 khan Sibarama Reang hi an khua Laitauhpara ah a ruang inkhai chu hmuh a ni.

Thudawnna pakhat dang chuan Siberam Reang ruang inkhai hi a kut leh ke tan a nih thu a sawi a, hetianga rawng taka inthahna duh lovin kawngzawh leh total bandh huaihawt a nih thu a sawi bawk.