Mizoram News

Green Mizoram Day atan thing ṭiak nuai 6 chuang lei tawh

Kumin Green Mizoram Day atan Environment & Forests Departmnet chuan thing ṭiak 6,40,250 a lei tawh a, hei hi Mizoram district tinah sawrkar department, tlawmngai pawl te leh zirna in hrang hrangte hnenah phun tura sem darh a ni dawn a ni.

Mizoram puma thing leh mau phun uar nana kum 1999 aṭanga sawrkar hmalakna kal zel Green Mizoram Day chu kuminah pawh hman leh ngei tura rel a nih angin nimin khan Green Mizoram Day 2013 Sub-Committee chu an Chairman Parliamentary Secretary Pu Lal Thanzara hovin an ṭhukhawm a, heta an thurel zingah Green Mizoram Day chu June ni 11, 2013 (Thawhlehni) ah hman an rawt a, he Ni-a inkhawm pui ber chu ICFAI University Campus, Durtlang-ah nghah nise tiin rel a ni bawk a. Green Mizoram Day hmannaah hian Mizoram Chief Minister Pu Lal Thanhawla chu khuallian ni tura beisei a ni bawk a ni.

Green Mizoram Sub-Committee Chairman Pu Lal Thanzara chuan sawrkar department hrang hrangten bial chan bik nei a thingphun hnatlang an neih ṭhin chu tih chhunzawm zel ṭha a tih thu leh an thingphun te an vil ngun leh ngun loh endik tura monitoring committee din pawh a ṭhat thu a sawi a. Hei hian nasa takin thingphunin boruak, sik leh sa a humhalh leh vawn dik dan mipuite a zirtir thei dawn a ni, a ti. Heng bakah sikul naupangte leh tlawmngai pawl hrang hrangte pawh thingphun uar tura inzirtir chu tih makmawh a ni, a ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram