Parliamentary Secretary Pu Lal Thanzara chuan nimin khan Aizawl-a HDFC Bank Branch 2-na chu Pu Zakamlova Building, Zarkawt-ah a hawng a, Pu Lal Thanzara nupui Pi Zohmingthangi’n HDFC Bank ATM a hawng nghal bawk a ni. Private Bank zinga a lian ber pawl HDFC Bank hian rampumah Branch 3062 leh ATM 10,743 a nei mek a ni.
Bank hawnna inkhawmah thu sawiin Pu Lal Thanzara chuan Bank rintlak leh mipuite tana dawr nuam tak HDFC Bank chuan ama bial chhungah ngei Branch a rawn hawng thei chu lawmawm a ti a. Mizoramah Bank thar engemawzat an rawn lut zel hi Mizote hmasawnna leh changkanna darthlalang a ni, a ti bawk. Bank-te hian mipuite harsatna hrethiam a, awlsam zawka an dawr theih nan theihtawp chhuah zel turin a chah a. Mizo mipuite pawhin mimal emaw hmun dangah an sum te dah emaw pun lovin Bank-ah ngei fimkhur leh him taka an dah turin inzirtir a ngai zel a ni, a ti bawk.