Nimin tlai khan Chief Minister Pu Lal Thanhawla kaihhruaina hnuaiah sawrkar mi pawimawhten Non Lapse-able Central Pool of Resources (NLCPR) chung-chang an sawiho.
He sawihonaah hian Ministry of DoNER-in DPR ngaih-tuah turah a pawm project 44 te chu mal te tea sawiho a ni a. DPR leh a ṭul dang peih fel tawh project te chu May thla tawp hma ngeia thehluh nise tih leh project dang DPR peih fel ṭep tawh te chu June ni 10 aia tlai lova thehluh nise ti a rel a ni a. 2013 – 2014 atana project, DoNER-in a pawm te chu July thla tawp hmain a DPR te chu peih fela thehlut turin Department aiawhte chu hrilh an ni. Meeting-ah hian NLCPR hnuaia project hrang hrang kalpui mekte chu a hun tiam chhung ngei a zawhfel a nih theih hma la turin Department te chu hrilh leh ngen an ni bawk.
Tun dinhmunah, Mizoram-ah NLCPR Project thawh zawh tawh 68 awmin, thawh mek Project 59 a awm a. Heng atan hian NLCPR sum cheng nuai 54,839.69 hman phalsak niin cheng nuai 29,517.25 chu pek chhuah tawh a ni. 2012-2013 chhung khan a pumpuiin Project thawh nan cheng nuai 8168.12 chu pek chhuah hman a ni a, DPR thehluh tawh ngaihtuah mek 44 a awm a ni.
Sawihonaah hian Planning Minister Pu H.Lian-sailova; Chief Secretary Pi L.Tochhong, IAS; Member Secretary, State Planning Board Pu Haukhuma Hauzel, IAS (Rtd) leh Department hrang hrang hotulu leh aiawh te an tel a ni.