Cricket Star, Sachin Tendulkar chuan Indian Premier League (IPL) Tournament aṭanga a chawlh thu a puang ta.
Tendulkar team Mumbai Indians chuan Pathianni zan khan Chennai Super King chu Run 23-a hnehin IPL title an la a, he match zawhah hian Tendulkar chuan TV Interview-ah a chawlh thu hi puangin, “Hei hi IPL ka khelh hnuhnun ber a ni tawh ang,” a ti a, “IPL khelh chawlhsan hi a hun ve tawhin ka hria, kum 40 ka ni ve tawh a,” tiin a sawi bawk.
Tendulkar hi thla hmasa khan kum 40 a tling ve tawh a, India-a fans ngah ber pawl niiin, International Centuries 100 siam thei hmasa ber a ni nghe nghe a ni.
Kumin IPL-ah hian Spot-fixing chungchang avangin buaina neuh neuh a awm a, he buaina avang hian Rajasthan Royals team bowler pathum leh Chennai Super Kings team neitu chu man an ni tawh nghe nghe a ni.