Mizoram News

HPC(D)-in an la inpeih hmanlo anga sawrkar puhna thudiklo niin sawi

Mizoram sawrkar leh HPC (D) te tun thla hapta hnuhnung bera inbiak chhunzawm tur chu HPC (D) lamin an thil phutte an la peih hman loh vanga sawn hlat nia sawi chu thudiklo niin HPC (D) chuan an sawi.

HPC (D) Information and Publicity Secretary John F.Hmar thuchhuahah chuan chanchinbu leh TV-ah te HPC (D) te’n an thil phut an la peih hman loh avanga tun thla hapta hnuhnung bera inbiak tura ruahman June thla lama sawn hlat nia an puan chu sawifiah a ngaia an hriat thu tarlan a ni a. Inbiakna turah hian HPC (D) chu an inpeih reng a, palai tur hming list pawh Mizoram sawrkar aiawhte hnenah an pe lut fel vek tawh a. Inpeih fel sa thlapin Mizoram sawrkar an ngaichang reng a ni tih Mizoram mipuite an hriattir niin an thuchhuah chuan a sawi.

An thuchhuahah chuan an thil phut (political demand) te phei chu sawrkar nena an inbiak dawn vang chauhva siam thar tur an nih loh thu sawiin, Hmar hnamin a mamawh thil hrang hrang avanga he pawl hi lo ding a nih avangin pawl din tirh aṭang rengin thilphut hi an nei sa niin an tarlang a. Hetianga thudiklo vawrh darh a ni hi pawi an tih thu an sawi bawk a ni.

Mizoram sawrkar leh HPC (D) aiawhte hi kumin January ni 31 khan Aizawl-ah an inbia a. Hemi ṭum hian inkahhai (Suspension of Operations) chu thla ruk chhung atan an ziak a. Inkahhai zawm ṭhat leh ṭhat loh dan endiktu atan sawrkar aiawh leh HPC (D) aiawh 3 ve ve awmna Joint Monitoring Group chu SP CID (SB) kaihhruaina-in din a ni a. Joint Monitoring Group hi April ni 19 khan an chairman SP CID (SB) Pu H.Ramthlengliana kaihhruaina hnuaiah Sakawrdai Tourist Lodge-ah an ṭhukhawm a. Hetah hian inkahhai chu a tawn tawnin an zawm ṭha thawkhata an ngaih thu an sawi a. HPC (D) aiawhte chuan tuna official level-a inbiakna kal mek chu political level-a hlankai an duh thu an sawi chhuak a. Sawrkar aiawhte chuan he rawtna hi sawrkarah lo thlen an tum thu an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram