Indian Society on Tobacco & Health (Mizoram Chapter) President Pi Lal Riliani’n Thingsul Tlangnuam chu Vaihlo leh a kaihhnawih awm lohna khua ‘Tobacco Free Village’-ah a puang.
Hemi puala Thingsul Tlangnuam Presbyterian Kohhran Hall-a Zirtawpnia inkhawm buatsaihah Pi Lal Riliani chuan nunna tam tak pawt tawitu, hriselna ti chhetu vaihlo leh a kaihhnawih do hi ram leh hnam hmangaihtu te tan chuan tih-mak-mawh, mawhphurhna kan kova innghat a ni, a ti. Vaihlo leh a kaihhnawih hmangtute zirchianna Global Adult Tobacco Survey report-in a tarlan danin Mizoram-ah mipui za 67% te hian vaihlo leh a kaihhnawih thil chi hrang hrang ei, hmuam leh zu an awm a, Mizoram sawrkar-a Economics & Statistics Department pawhin Mizo zingah vaihlo leh a kaihhnawihin a thlen natna avanga thi an tam ber tih a hmu chhuak a ni, a ti.
Pi Lal Riliani chuan Thingsul Tlangnuam-in vaihlo leh a kaihhnawih tih rem tuma an hmalakna a fak a. Khaw dangte entawn tlak khawp a tha leh hlawhtling a hmasawn zel tura duhsakna hlan chungin Thingsul Tlangnuam khua chu “Tobacco Free Village” ah a puang a ni.
Sawrkar thuchhuahin a tarlan danin Thingsul Tlangnuam khua hian kum 2012 kum lai hawl vel aṭang khan Tobacco Free Village ni thei tura hmalakna an kalpui ṭan a. Ṭhahnemngai leh inlungrual taka an hmalakna chu Indian Society on Tobacco and Health (Mizoram Chapter) chuan hma lak chhoh puiin Mizoram State Tobacco Control Society (MSTCS) pawhin a ṭul ang angin hma a lakpui bawk a ni. Kohhran hrang hrang, tlawmngai pawl hrang hrangte leh Village Council aṭanga khawtlang aiawh kal khawmte chuan Anti-Tobacco dinin member te chuan area hrang hrang chan an insem a, chhungkaw tin hnenah campaign beihpui an thlak ṭhin a. He khua in Vaihlo leh a kaihhnawih thilte an hman dan Survey chu March 2013 chhung khan kum 13 chin chunglam zawngah neih a ni.
He Survey atanga a lan dan in Thingsul Tlangnuam khua ah hian in 257 a awm a, kum 13 chin chunglam hi mi 923 an awm bawk a ni. Heng kum 13 chunglam zingah hian Vaihlo, a zuk emaw a hmuam chi hmang mi 655 (70.96%) an awm a. Meizu thin mi 312 (33.8%), Sahdah hmuam thin 362 (39.2%), Tuibur hmuam mi 74 (8%), Vaihlo a zuk chi leh hmuam chi hmang kawp mi 59 (6.4%) an awm a ni. Hemi bakah Kuhva ei thin hi 509 (55.14%) an awm bawk a ni.