Kumin thla 3 chhungin TB vei 497 hmu chhuak

Mizoramah TB benvawn vei hmuhchhuah thar zel an ni a, kumin January leh March thla chhunga Mizorama TB vei hmuhchhuah zawng zawng mi 497 zinga mi 164 te hi an khâka TB hrik hmuh an ni a, khaka hrik hmuh enkawl zinga zaa 88 chu enkawl dam an ni a, anni bakah hian MDR- TB vei thar mi 6 hmuhchhuah an ni bawk.

He thu hi, kumin chhunga TB enkawl leh hmuhchhuah chungchangah Ist Quarter (January – March,2013) Review Meeting nimina Aizawl-a neihah tarlan a ni a, he meeting hi Dr.Vanlalhruaii, State TB Officer chuan a kaihruai a, khuallian Dr.K.Ropari, Directorate of Health Services chuan thusawiin, Mizoram a TB enkawlna dan thar Revised National TB Control Programe (RNTCP) hi kum 2003 atanga hman tan anih atanga vawiin ni thlengin thla thum danah meeting hi regular taka neih thin a nih thu a sawi a. TB treatment la tha duh lo te avangin midangin TB natna an lo kai phah thei a, chuvangin TB vei ten damdawi an eitur ang tha taka an ei zawh a pawimawh a, TB Leh HIV natna hi vei kawp theih a ni a, kar hnih emaw a aia rei khuh ten TB natna vang a ni thei tih hria in a rang lama inentir a, khak exam tir a pawimawh a ni, a ti.

Dr. Harvey Vanlalpeka, Asst. Programe Officer leh Dr.Lalhriatpuia, MO, State TB Cell ten power point presentation hmangin thla thum chhunga performance report leh Multi Drug Resistant (MDR-TB) enkawlna chungchangah presentation an pe a. January – March,2013 chhungin Mizoramah TB vei hmuhchhuah zawng zawng mi 497 an awm a, heng zinga mi 164 te hi an khaka TB hrik hmuh an ni a, khaka hrik hmuh enkawl zinga 88% chu enkawl dam an ni. Heng bakah hian MDR- TB vei thar mi 6 hmuhchhuah an ni bawk.

He meeting ah hian District tin atangin Chief Medical Officer, District TB Officer, Senior Treatment Supervisor, DOT Plus Supervisor, Senior TB Laboratory Supervisor bakah NGO atangin Zoram Entu Pawl (ZEP) leh Christian Medical Association of Indai (CMAI) atangin representative an tel bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram