MNYF-in Chief Minister te unau bâng turin phût

MNF thalai, ZNP leh MPC party chuan Laipuitlang – Ramhlun Venglai lai tawlh vanga chenna In engemawzat a chhia te, mi engemawzatin nunna an chan leh hliam an tuar chu pawi an tiin, an tuarpui takzet tih an sawi a. MNF |halai chuan he thil thlengah hian Chief Minister te unau chu a mawhphurtu-ah puhin bang turin an phut.
MNYF thuchhuah chuan he vanduaina lo thleng hi pumpelh theih nilo mahse, nikum October ni 11 khan helai hmun hi lei a che in a khi tawh a, Laipuitlang Local Council leh YMA ten, lei hi a ngheh loh avangin a min palh a nih pawha a zia awm nan, PWD Mechanical Sub- Division office leh a bul hnaia Assam Type, PWD building tho chu thiat turin sorkar an ngen a, PWD an chet mai loh avangin Assam Type phei chu khawtlangin an thiat hial niin an sawi.
PWD building (Concrete) chu sorkarin a thiah har em a vang leh, April ni 9, 2013 ah thiat tura work order a pek chauh a vangte, a thiat tura hna hmutu contractor-in a thiah muan em a vangtein he vanduaina hi nasa takin a belh chhah ta niin an sawi a. He chhiat tawhnaah heti taka nunna tam chan a nih chhan hi, Mizoram PWD chet muan vangah puhin, Chief Minister te unau in banna an theh luh ngei an rin thu leh, an bang duhlo a nih chuan, PWD chu midang kutah hlan turin an phut tih an tarlang bawk.
Aizawlin chhiatna rapthlak tak a tawh mek laia Congress party a mithar lawmlut tur anga insawia Thenzawl-a Chief Minister a kal thu leh mak an tih thu sawiin, hmun hla taka awm pawh nise thlawh haw vang vangna tham a ni, an ti a. Mipui tawrhna leh lungngaihnain CM ngêng a chhun phalo hle ah kan ngai a, vanduaithlak kan ti tak zet a ni, an ti bawk.