Thli chhia ‘Mahasen’ an tih mai Mizorama alo thlen dan tur chungchang chu Science & Technology Department-in a thlithlai reng a, nimina Regional Meteorological Centre, Guwahati leh Indian Meteorological Department, New Delhi nena inbiakna hnuhnung berah ni 16 (Ningani) zan dar 10 velah Mizoram lo thleng tura rin a ni.
He thlipui hi Lunglei aṭanga chhim lamah na deuh tura hlauhthawn a ni a, darkar khatah km 50 – 70 vela chak a nih rin a ni. Hmar lamah chuan na lo zawk deuh tura beisei a ni. Amaherawhchu ruahpui nasa tak a ken ngei rin a ni.
Hemi chungchangah hian Chief Minister Pu Lal Thanhawla chuan mipuite chiai lo turin a ngen a, mahse fimkhur tura chah pahin, Pathian nung hnena ṭawngṭai nasa leh zual turin a chah a. Sawrkar department te pawh thiam ang anga inralring turin a hriattir bawk a ni.
Hetihlai hian Principal Scientific Officer Dr. Vanlalzara chuan zawhna chhangin, he thil avang hian tul lo chiai loh tur a ni a ti a, he thli chhia hi a lo tleha Mizoram a rawn thleng a nih pawhin Ningani hma chuan a lo thleng dawnlo a, tun dinhmuna a lan dan chuan thlipui hi Bangladesh lamah a kawia, Mizoram a rawn thleng ve a nih pawhin a na tawh lo tura ngaih a ni a ti a, tunah hian khawchin thlirlawkna mai an sawi a ni a, vawiinah erawh thli awm dan tur hi chiang zawkin a hriattheih an beisei a ni.
Cyclone tleh tur thuthang avang hian mipui an ralkhel hle a, Aizawl-ah chuan school ṭhenkhat chu nimin aṭanga ni 3 chhung an khar hial a, hei vang hian Chief Minister chuan nimin khan mipui hnenah chiai lo tura thuchah a siam hial niin thulakna chuan a tarlang.