Central YMA thuneitu sang Central Executive Committee (CEC) chu Inrinni khan Central YMA Committee Room ah ṭhukhawm in Electoral Roll a ramdangmite an tel lohna tura hmalak dan tur an rel.
CEC ṭhukhawm hian Electoral Roll Revision neih tur ah ramdangmi te an tel lohnan Sub Headquaters leh Branch tinah fimkhur leh chik zawka hmalakna kalpui ni se, Sensitive Area bik-ah chuan CEC member te’n ṭhut chilh-a ngun zawka en pui nise tih an rel a. Rangvamual leh Phun-chawnga ramdangmi leh zu zuar te dap hna chu ngawrh leh zuala kalpui chhunzawm tum a ni a, hemi atan hian khawpui chhunga Branch hrang hrang te chu duty hun siam a ni dawn a, Tuirial, Tuikhur Hlu leh Tuirial Airfield a ramdangmi leh Zu zuar te pawh Inthiar fihlim tur a hmalak nise tih te an rel bawk a ni.
Hei bakah hian kumin YMA Day hman dan thlirlêtin Branch hrang hrang hman dan chu lawmawm thawkhata an hriat thu leh Media lamin an puihbawmna ah lawmawm an tih thu leh, chutih rual erawh chuan Thingphun tur a hun takah hmuh a nihloh vanga duh anga thing an phun tam theilo chu pawi an tih thu an sawi a. Tunhnai a khawvel tlangsang ber Mt. Everest hlawhtling taka lawnchhuak David Zohmangaiha leh Vanlalliana te chu October thlaa Khawbunga General Conference neih tur ah chawimawina thu ziak bakah Rs.10,000/- ve ve hlan ni se tih te Inrinnia CYMA CEC ṭhukhawm chuan an rel a ni.