Tuikuk raltlan te lakkir tuma ruahmanna siam mek a ni

Tripura relief camp-a Tuikuk raltlan la lakkir lohte chu a hma thei ang bera lakkir tuma ruahmanna siam mek a ni a, Tuikuk raltlan tam tak erawh chuan Mizoram lama an kir loh theihna tur chhuanlam an la dap zui zel thung niin a lang.

Mizoram sawrkara Home Department-a Joint Secretary Pu Lalbiakzama kaihhruaiin official 4 chuan Ningani leh Zirtawpni khan North Tripura District-a Kanchanpur Sub-Division huam chhunga Tuikuk raltlante awmna camp 6 an tlawh chhuak vek a. Raltlante kokhawmin camp tinah inkhawm an buatsaih a. Mizoram sawrkar leh Tripura sawrkar ṭangrualin Mizorama anmahni thu-a an kir leh (self-repatriation)-na atana sawrkar thil ruahman dante an hrilhfiah a ni.

Tuikuk raltlan hruaitute hian Mizoram an kir hnu-a chhungkaw tinin an sum hmuh tura ruahman Rs.80,000/- chu tlem an tih thu leh Rs.1,50,000/- tal ni se tih leh a thlawna buhfai leh thildang an dawn chu kumkhat atan ni lovin kum 2 atan ni se tia an duh thu an sawi a. Hei hi chhangin Mizoram leh Tripura sawrkar official-te chuan a thlâwna ration dawn chen tur leh an inbenbelna tur sum dawn tur hi state sawrkar thu ni lovin Union Home Ministry thu a ni a. Chubakah tuna ruahmanna awmsaah chuan a thlâwna ration an dawn mek hi kumin September thlaa tawp tur a ni a. Hemi chhuanlam hmanga Mizorama an kir duhlo a nih chuan Mizoram sawrkar mawhphurhna a nih tawhloh thu chiang takin an hrilhfiah niin Inrinni-a Aizawl lo thleng leh Pu Lalbiakzama chuan a sawi.

Pu Lalbiakzama chuan camp an tlawh hma hian North Tripura Bawrhsap leh SP te nen an inkawm khawm a. Sawrkar ruahmanna kal mekte an inhrilh fiah tih a sawi a. Tuikuk raltlante lokirna tur atan hian ruahmanna siam mek zel a ni a, Mamit District thuneitute chu ruahmanna kimchang lo siam tura hrilh an ni a. Chutih rual chuan Mizoram an lo luh hnu-a a thlâwna ei tur (free ration) an dawn tur atan Food, Civil Supplies and Consumer Affairs lamah allotment buaipui mek a nih thu a sawi bawk.

Tuikuk raltlante laklet chhunzawm hun atan May thla hapta hnuhnung ber kha ruahman a ni a, mahse, Mizoram leh Tripura inrina velah boruak a ṭhat vakloh avangin sawn hlat a ni a. Tunah hian ruahmanna thar siam mek a ni chungin a hun tak tur chu puan a la nilo a ni.