Nimin khan Lalthanhawla Higher Secondary School, Serchhip chuan an sikul bul New Serchhip YMA Hall-ah kumin HSSLC result an neih ṭhat an lawm a, Bialtu MLA, Chief Minister leh he sikul hming put chhan ni bawk Pu Lal Thanhawla chuan khuallian niin a hmanpui a, Pu Lal Thanhawla chuan Khuallian chuan ama hming chawia zirna in din tum an awm fo thawh thu leh a remtih ngai loh thu leh hmingchawi chhantlak a awm loh thu a sawi.
Pu Lal Thanhawla chuan Serchhip khawtlang pawhin he sikul an din dawna an râwn thute leh rem a tihbik loh thute leh ama hming chawi a nih vanga a tel ve kher lem loh thute pawh a sawi a, amaherawh chu khawtlang mamawhna a sân em avang leh mipui ṭahawhna a nasat avangin khawtlang hruaituten mahni kea din inhuamin, lungrual takin an lo din ta a, sikul la naupang tak a ni chunga hetiang result ṭha a nei thei chu a lawmpui takzet a ni a ti.
Chief Minister chuan Mizoramah zirna in tam tak, sawrkain sum tam tak senga a enkawl ‘Nil’ result nei an awm fo thute sawiin hetiang sikulte chu tihtawpa a thawk ṭhate ṭha lehzuala an thawh theih nana chawmdawl a ṭhat zawk a rin thu a sawi bawk.
Pu Hawla chuan Mizoram sawrkarin world class education neih tumin theihtawpin tan a la a, tualchhung mite mai bakah zirna lama India rama mi thiam ber berte kaihhruaina hnuaiah Education Reforms Commission te dinin chu commission chuan zirnain hma a sawn nan rawtna tha tak a siam a, amaherawhchu a tithlawhtling turin sum tam tak mamawh a nih avangin leh kan state in thawhchhuah kan neih tlem rih si avangin tun dinhmunah kan phak tawk ang zelin a tha thei ang berin he recommendation hi kan bawhzui mek a ni a ti bawk a ni.
Lalthanhawla Higher Secondary School hi kum 2011 a din a ni a, Arts leh Commerce zir theih niin tun inhmunah Principal nghet tur ngaihtuah mek a ni a, lecturer 15 an awm mek a, Arts lamah subject 7 leh Commerce Stream-ah subject 3 a awm mek a ni. He sikul hian din an nih aṭangin HSSLC exam vawi hnih an hma-chhawn tawhah 100% an la passed ve ve a ni.
He hun hi Pu PC Vanlalsawma, Chairman Managing Committee Lalthanhawla Higher Secondary School chuan a kaihruai a ni.