Inkaihhruaina mumal awmlo chuan kaltlangpui ṭha ti lo

Pre-Service Teacher Education Trainees Union, (PSTE) DIET te chuan Mizoram sawrkarin SSA zirtirtu te tana Mizoram Teacher Eligibility Test (MTET) exam an neih turah inkaihhruaina mumal a awm loh chuan kaltlang pui ṭha an tih loh thu an sawi.

Nimin khan Aizawla thuthar lakhawmtute Aizawl Press Club ah kawmin, Aizawl leh Lunglei a PSTE aiawh an pawl Gen. Secretary PC Lalruat-fela leh Zirsangzela Hnamte te chuan MBSE thuchhuah anga kum 2010 August ni 23 hnu lama SSA zirtirtua lut te tana MTET exam tun thla ni 17 a buatsaih tur chu an pawm a, amaherawhchu, SSA tan bika exam buatsaih-ah hian zirtirtu dang te an luh ve theih loh nan leh MTET pass chauh te an luh theih nan dan felfai tak siam hmasak ni se an ti.

PSTE te chuan SSA zirtirtu MTET exam te zingah fail an awm a nih chuan bân an nih ngei dawn leh dawn loh ti chiang turin sawrkar an phut tih an sawi a, hei bakah hian MTET chu, SSA hna bik atana exam a nih dawn avangin zirtirtu hna dang dil nana tehfungah hman ni lo se an ti a, SSA zirtirtu MTET paltlang Untrained te chu, In-Service training tura koh theih ni lo se an duh tih an sawi bawk.

PSTE te hian dan anga Training kaltlang si a, department dang anga a zirchhuakte duhsakna an dawng ve si lo chu ṭha an ti lo hle tih an sawi a, an thil phutte chu tihhlawhtlin anih loh chuan a tawp thlenga an dodal tur thu an sawi a ni.

PSTE Trainees Union DIET tia invuah ten Press mite an kawm dawn tih a hriat avangin, niminpiah khan Sawrkar chuan thil awmzia sawiin thuchhuah a lo siam khalh tawh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram