Serchhip News

Meeting nei

Nimin khan Serchhip District Election officer leh Deputy Commissioner ni bawk Pi Juhi Mukherjee hovin ama room-ah Systematic Voters Education and Enrolment Participation chungchangah inthlan kaihnawiha sawrkar official-te leh Political Party hruaitute nen meeting an nei.

He meeting-ah hian Electoral Roll-a awm thei zawng zawng an inziahluh vek theihna tur te, Voters-ten an mawhphurhna an hriat chiana an hlenchhuah ngei theihna tura zirtirna pek dan tur te leh Electoral Roll dik leh felfai tak kan neih theihna tura sawrkar official, political party leh tlawmngai pawlte nena ṭanho dan tur te ngaihtuaha sawiho a ni. Tin, Electoral Roll Special Summary Revision neih meka District Election Officer-in hmalak dan tur a duan lawkte thlira ngaihtuahho a ni bawk.

District Election Officer chuan inthlan leh electoral roll chungchang hi democracy ramah chuan thil pawimawh berte zing a mi a ni a, chuvangin hemi chungchanga meeting koh a nih reng rengin sawrkar official-te chu an kal ngei ngei tur a ni a, an kal theih loh chuan ziakin a hnenah an kal theih loh chhan an thehlut ṭhin tur a ni a ti a. Tin, roll-a lut thar ten ngaih ngam leh tlangnel taka vote an thlak theih hi a pawimawh a, chutiang atana zirtirna pe thei turin Campus Ambassador atan Government Serchhip College Principal leh Government Serchhip Higher Secondary School Principal-te ruat an nih thu sawiin, khua zawng zawngah a theih ang angin heng vote nei tharte tan hian vote thlak dan zirtirna te pawh neih tum a nih thu a sawi bawk.

Electoral Roll Special Summary Revision neih mek chungchanga hun ruat ni pawimawhte chu heng a hnuai a mite hi a ni:

Draft Roll (Tuna hman lai mek) tihchhuah hun: 1st July, 2013 (Hei hi ERO leh AERO te bakah mahni awmna veng Booth Level Officer te hnenah en theih a ni ang).

Dilna thehluh theih hun chhung: 1st – 15th July, 2013. (Hming thun thar leh paih ngai paih, vote neihna hmun sawn, hming leh thil dang dik lo siam ṭhat etc. dil theih hun chhung. Dilna form hi mahni veng BLO hnen aṭanga lak theih a ni ang)

Roll hman lai meka chuang zawng zawngte khawtlang hruaitu leh tlawmngai pawlte nena thlir ho hun: 4th – 5th July, 2013

Zir chian leh vil zui ngai bik hmunte a Special Campaign neih hun: 11th – 13th July, 2013

Dilna lutte ngaihtuah (Hearing) hun: 1st August, 2013

Electoral Roll thar tur siamṭhat hunchhung: 1st – 10th August, 2013

Electoral Roll thar tarchhuah hun: 16th August, 2013

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram