MNF-in sum leh pai dinhmun siamṭhatna tura an duan tlangzarh

Eptu Party lian MNF chuan nimin khan an party-in state sum leh pai dinhmun siamṭhatna tura a duan, Socio-Economic Development Programme (SEDP) an tih chu an tlangzarh.

SEDP tlangzarhtu, MNF President Pu Zoramthanga chuan, Political party ṭhenkhatin, MNF in Programme leh Policy an nei lo em ni ti a an zawh thin chu an hriat loh vang a nih loh pawhin an hai der vang a ni ang a ti a, nimina an tlangzarh tak chu, ei leh bara intodelhna tur leh ram hmasawnna tur pawimawh zual tlangpui tarlanna a ni tih sawiin, PC party te Six Basic Needs en chungin buatsaih a ni a ti.

Pu Zoramthanga chuan intodelhna chu an ngaih pawimawh hmasak a ni a ti a, tunhma lama sawrkarna chelhtu ten policy an lo hman tawh Garden colony te, NLUP leh MIP hnuaia hmalaknaa chhunzawm leh chhawm nun tlakte keng tel zelin, a changtlung zawk an buatsaih niin a sawi a, intodelhna tura tih tur an duanah hian party dang te an tih tawh mai avanga inhlamchhiah sak chu an tum ve dan a ni lo tih a sawi.

An sawrkar laia Grape, Red Oil Plam leh Sapthei hmanga bul an lo ṭan tawhte, Sawhthing leh Aieng, Hmunphiah thlengin awmze neia ching tura hmalak an tum a, ṭhalai te hmakhua ngaihtuahtu tur Youth Commission chu chak taka kalpui an tum bawk a, hei bakah hian Bamboo leh Rubber te, Health Care Scheme leh Power lama intodelhna tur chungchangte pawh MNF President chuan a tarlang bawk a ni.

Nimina inkhawm kaihruaitu MNF Vice President, MNF Programme & Policy Drafting Committe Chairman ni bawk Dr. R.Lalthangliana chuan, MNF policy leh programme an duan chu Bu chhah tak anih avangin, a thawh khat na atan SEDP bik hi tlangzarh a nih phawt thu a sawi a, Political- ah Mizote luah chin ram siam fel te, Zohnahthlak inpumkhatna tura hmalak te, Mizo ṭawng chawisanga mahni hnam leh sakhua humhalh te leh thil dang ṭhahnem tak an policy ah chuan a tel tih a sawi a ni.

Dr. LalThangliana chuan, Zirna chungchangah hmachhawp awmze neia kalpui tuma hma an lo lak tawhna chhunzawm leh te, tuna Lumpsum Aided School 26 te Adhoc Aided-a dah tur-a sawrkar-in tih ngaihna a hre lo ang chite chu sawrkarna an chang leh a nih chuan harsatna awm lovin awlsam te-a chinfel mai an tum dawn niin a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram