Farkawn MZP Sub-Hqrs hawnga kal MZP hruaitute chuan an haw lam lo dan tum-tu nia sawi Vaphai khawtlang hruaitute an inbiakna an neih hnuah Inrinni tlai khan Farkawn an chhuahsan.
MZP Gen. Hqrs. hruaitute sawi danin Farkawn MZP Sub-Hqrs hawnga kal MZP President Pu James Thang-hmingmawia leh MZP hruaitu thenkhat te haw lam chu Vaphai khaw mipuiten dan an lo tum niin sawi a ni a, hemi chungchang ngaihtuah hian Zitawp zan khan MZP Gen Hqrs hruaitute chu an pisa-ah zing dar 2 thleng an ṭhukhawm a. An thurel bawhzuiin Home Minister Pu R.Lalzirliana chu Inrinni zing khan a chenna inah an hmu a, him taka MZP hruai-tute an hawn theih nana hma la turin sawrkar an ngen a ni.
Thu dawn danin Farkawna MZP Sub-Hqrs. hawng tura kal MZP president leh amah ṭawiawm tute hi Zirtawpnia an tih tur an tih zawh hnu tlai lamah Vaphai ṭhalaiin MZP hruaitute haw lam chân an tum nia Police te’n sawiin, a zan zana a ruka haw turin MZP hruaitute hi an ngen a. Mahse MZP hruaitute hian a zan a zana haw chu ṭha an ti lo niin thudawnna chuan a sawi. Farkawn MZP hruaitu-te’n Vaphai hruaitute lam biain palai hna an thawk ta a. Zirtawpni zan khan Farkawn MZP chuan Vaphai-ah palai an tir a, Vaphai hian Chawngtui pengah inbiak an rawt a, MZP lam te hian Saikhumphai Issue-a kal an nih loh thu sawiin inbiak tul an ti lova, Mahse Inrinni khan Vaphai lam te hi Farkawnah kalin rei tak an inbia a, tlai dar 4 vel kha an thleng nia sawi a ni.
Vaphai lam hian MZP te chu FIR hnukkir turin an ti a, mahse MZP te chuan an thei loh thu an sawi a, Vaphai lam chuan MZP hruaitute chu an dan dawn loh thu leh Vaphai ram chhungah phei chuan an escort tur thu an sawi a, MZP hruaitute hi tlai dar 4:30 vel khan Farkawn chhuahsanin Aizawl lam panin East Lungdar lam kawngah an haw ta a ni.