Home Minister Pu R. Lalzirliana chuan sawrkar leh HPC (D) aiawhte inbiak hun tur a la hriat theih loh thu leh HPC (D)-te’n political level-a inbiak an duh thu an thlen chu ngaihtuah a la nih loh thu a sawi.
Pu R. Lalzirliana chuan zawhna chhangin HPC (D) nena inbiak chhunzawmna hun atana rawtna hi siam a nih thu a sawi a, chu rawtna ‘file’ chuan a hnen a la thleng lo niin a sawi. Delhi-a Rural Development lama inkhawm-pui bakah Chief Minister leh Home Minister te Security lama inkhawma tel tura a kal haw lamah hemi chungchangah hian thutlukna siam a nih tur thu a sawi a ni. HPC (D) te’n official level-a inbiakna kal mek chu political level-a hlankaia chhunzawm nise tih an rawtna chungchangah chuan Chief Minister nena sawiho phawt hnu-a thutlukna siam tur a nih thu Home Minister chuan a sawi a ni.
Mizoram sorkar leh HPC (D) aiawhte hi kumin January ni 31 khan Aizawl-ah an inbia a, hemi hma hian Silchar-ah inbiak dan tur duangin an lo inbe tawh bawk. Aizawl-a an inbiaknaah hian thla ruk chhung atana inkahhai (Suspension of Operation) thuthlung an ziak a. April ni 19 khan inkahhai zawm a nih dan viltu atana din SP, CID (SB) kaihhruai Joint Monitoring Group chu Sakawrdai Tourist Lodge-ah an inhmukhawm a. Hetah hian HPC (D) chuan inbiakna kal mek chu political level-a hlan kai an duh thu sorkar official-te an hrilh a, sorkar official-te hian sorkarah he thu hi an thlen tawh a. Hemi hnu hian May thla hapta hnuhnung bera inbiakna chhunzawm tum a nih laiin tun thlengin chhunzawm a la ni ta rihlo a ni.